Eliz Gatenyo
El aktor prensipal de la seria de los filmos de Harry Potter, Daniel Radcliffe, asisto a un reportaje de BBC ke se yama “Ken krees ke sos?” Aviya una notisia de polisiya ke “los judios son responsavles de la destruksyon de sus proprios lokales komersiales”. Akel momento le dieron a meldar una letra ke desho su bisnono antes ke se suisidara. Sus ojos se incheron de lagrimas i ampeso a yorar kon impo.
Radcliffe ke es judio de la parte de su madre, meldo la nota de la emisyon ke eksplikava, komo su bisnono Samuel Gershon, un merkader judio de 42 anyos, aviya formado kon anyos una djoyeriya en Londra ke paso de padre a ijo. I kuando fue viktimo de un rovo en 1936 i peryo todo, Gershon i su ijo se adresaron a la polisiya. Ma akel tiempo ke ya aviyan ampesado los ayres del antisemitizmo, la polisiya dyo un raporto ke este rovo fue echo mahsus. Siguro ke fayito, Gershon se sintyo abandonado por su famiya i se mato. Despues del suisido, la kompanyiya pago una partida de la perdita ma siguro ke ya era muy tadre.
En meldando el raporto de la polisiya, disho Radcliffe ke aviya muncho de investigar en esta fraza. Estava muy sorprendente de ver ke un judio fue konsiderado sin provas, komo kulpavle. Kere dizir ke paso lo ke paso, en tanto ke judios dainda tenemos muncho de dar a entendermos i dar a konosermos a las personas ke estan a muestros entornos.
Radcliffe era muy kerensyozo kon su nona maternala. En un reportaje konto ke su nona fue salvada de Londra en el tiempo de la gerra, debasho de las bombas de los Nazistos.
El konto: Mi famiya era de orijin de Rusiya i se fuyeron de aya durante los pogromes. No se si la istorya es djusta ma lo ke se es ke kuando se fuyo mi bisnono de Rusiya se suvyo a un vapor sozde ke se iva ir a la Amerika. Ma kuando el vapor izo una eskala en la Ingletierra para tomar komanya ets., le paresyo a su bisnono ke ya ayegaron a la Amerika; se yerro i abasho del vapor. Estava kontente ke el viaje aviya turado poko. El aya topo un echo en una fabrika de textiles i se kazo kon la ija del patron.
En el reportaje, Daniel Redcliffe konto ke el tiene una edukasyon sekular i kontinuo “Puedeser vos va desepsyonar, ma el djudaizmo es emportante mas muncho, para mi madre i mi nona.”
Radcliffe esta djugando en el filmo JUNGLE ke se esta travando en Bolivia, la vida del Israelyano, Yossi Ghinsberg, ke estava viajando kon la chanta en la espalda i ke se peryo en la jungla.
