Forti Barokas
El 18 julyo djueves la tadre a la ora 7, el koro NES kon el konduktor İZZET BANA tuvimos la onor de dar un konserto en la izla BÜYÜKADA Anadolu Kulübü, en el salon de konferensya por la sigunda vez. El program empeso kon la avla de FORTİ BAROKAS ke dyo a entender komo nasyo las romansas sefaradis, komo vino fina oy en dia i komo se adapto a la muzika turka. İZZET BANA konto komo se formo el grupo NES ke kere dizir miraklo en ivrit.
Una muchadumbre de 250 personas asisto a esta aktividad i de las palmas se entendyo ke plazyo i tuvo muncho sukseso. Un repertuar de 20 kantikas la mayorita byen konosidas, en munchas, los oditores kantaron kon el koro endjuntos. ORA GÜRKAN (Los Bilbilikos) SİBEL SALTİEL (Mi amor i Adiyo) SUZİ KOVOS-TUNA MİZRAHİ-LÜSET KOEN- ORA GÜRKAN (Kanaryero) i İZZET BANA (Tres de la noche va pasar) interpretaron kantantes solistas kon sus bozes ermozas i sentimantal. El konser termino kon la kantika ke ya se izo el imno de el koro NES “LA VİDA DO POR EL RAKİ”.
Agradesimyentos al ANADOLU KÜLÜBÜ ke mos avyo las puertas, al direktor CEMALETTİN ŞEREFLİER por sus ayudas a los direktores de la orkestra en el piano, NAZIM KERKES; en el vyolon, KEREM ÇELİK; perkusyon, ÖZGÜR BAYER i a SİLVYO OVADYA ke peno para realizar este konserto i envito a todas las koristas a komer.
Siempre alegres, estos i munchos.
