Antes ke Evian se konosyo komo una marka popular de agua mineral natural, en el sentro turistiko fransez de Evian tuvo lugar una konferensiya enternasyonal para abordar la grande kriza de los djudios ke bushkavan remedyos para fuir las intensyones de jenosidio del Treser Reich de Hitler.
Sinko anyos despues de ke Hitler tomo el poder en 1933, kon el primer buto de azer la Alemanya “judenrein” (sin djudios), 150,000 djudios almanes, ¼ de la povlasyon djudia de Alemanya, pudieron fuir del país. En marso de 1938, kuando la Alemanya aneksyo la Austria, otros 185,000 djudios entraron debasho la hegemonya almana. El tyempo pasando, no era mas fasil para los djudios de topar paizes ke los ivan akseptar.
En 1924, achakes del espanto ke los imigrantes tomaran los empleos de la mano de los amerikanos, los Estados Unidos establisyo kotas de imigrasyon. En 1929, despues de la “Grande Depresyon”, la situasyon se izo mas difisil. Malgrado la presyon sovre el presidente Franklin D. Roosevelt para ke aksepte a resivir a los djudios ke biviyan debasho Hitler, el governo de los Estados Unidos no aksepto a avrir sus frontyeras. Alora, la F.D.R. konvoko una konferensiya enternasyonal en Evians-les-Bains, Fransya, ke empeso 6 de julio de 1938, ke es el 7 de Tammuz a la djudiya. 32 países i 24 organizasyones no governamentales (ONG) partisiparon a esta konferensiya.
Malgrado ke durante los mueve diyas de la konferensia todos los partisipantes amostraron una simpatiya por la situasyon difisil de los djudios ke bushkavan fuir la Alemanya nazi, los Estados Unidos i la Gran Bretanya kontinuaron a sus ekskuzas i a la retorika de la razon por la kuala no estavan dispuestos a avrir las puertas de sus respektivas nasyones. Sólo la Republika Dominicana aksepto 100,000 imigrantes djudios. En lugar de mandar a su Sekretario de Estado, la F.D.R. embiyo a la konferensiya su amigo, el emprezyo Myron C. Taylor a Evian. Golda Meir asistyo komo observadora, reprezentando la Palestina britanika ma no le permetyeron ni avlar ni partisipar a las diskusyones.
Kuatro mezes despues del fiyasko relativo de Evian, akontesyo el malorozo Kristallnacht, lo ke rezulto en la nesesidad de emigrar de Alemania de una manera mas kritika. Semanas mas tadre, empeso la redaksyon de un proyekto de ley de imigrasyon ke iva permitir a los chikos refujyados a entrar a los Estados Unidos kon el apoyo de la Primera Damma Eleanor Roosevelt, komo su primera pozisyon publika en un tema de polítika nasyonal, referandose al Kindertransports, ke las nasyones de la Evropa aviyan empesado. En febrero de 1939, el senator Robert Wagner (D-NY) i la kongresista Edith Rogers (R-MA) aparejaron proyektos de ley semejantes para admitir a 20,000 kriyaturas almanes refujyados mas chikos de 14 anyos durante un peryodo de dos anyos, asegurando ke los chikos resiviran apoyo de las donasyones privadas. El presidente Roosevelt nunka izo komentaryos sovre el proyekto de ley de Wagner-Rogers i los myembros del Kongreso se opozaron al proyekto de ley dizyendo ke va rezultar en la pujita del shomaje en los Estados Unidos. El publiko amerikano kedo desganado a avrir la fronytera, malgrado los malores kontra los djudios ke aprovaron fuir dezesperadamente la Alemanya nazi: el arivo del SS St. Louis i el treser Livro Blanko britaniko, ke defendiya a los djudios a entrar a la Palestina o merkat tyerra. La Segunda Gerra Mundial empeso el uno de Septiembre de 1939, kuando la Alemanya okupo la Polonya.
El fiyasko de la Konferensiya de Evian i la non-aprobasyon del proyekto Wagner-Rogers, rezulto en la forma ke munchos más djudios fueron matados por el Treser Reich.
