Segun las otoridades de antikuedades de Israel, una inskripsyon vieja de 2100 anyos, es probablamente la primera ke kontyene la palavra Yerushalayim en su nombre kompleto. (Komo se pronunsya oy en dia).
Una kolumna ke fue rezin deskuvyerta, antes de meter las primeras piedras del kamino serka de Binyaney Ha’uma, el sentro de reuniones, tenia una inskripsyon en su orijinal. La kolumna de piedra de una struktura Romana del primer siglo (AC) kon su kontenido en Arameo dize, ‘Hanania Ben Dodalos Mi Yerushalaim’ (el Arameo era la Lingua Franka de la Rejion de esta epoka). I lo ke kere dizir es: ‘Hanania ijo de Dodalos de Yerushalayim’.
De todo modo los arkeologos no estan muy siguros de la identidad de Hanania i de Dodalos. Es tambien posible ke estos dos sean empleados de una fabrika de barro ande aziyan kalderas, porke las ruinas estavan muy serka de la Kolumna.
Lo ke es muy kuriozo es ke la inskripsyon nos da a saver korektamente el lugar ande eyos biviyan; Yerushalayim.
En esta epoka, Yerushalayim devia ser eskrito kon un ‘yod’, aunke oy eskrivimos Yerushalayim kon dos ’yods’.
Agora esta Kolumna esta en ekspozisyon en el Muzeo de Israel, en la sala del Segundo Bet Amigdash.
(Artikolo del Haaretz)
