Esta semana estavamos envitados a una Bar Mitzva. Komo siempre aviya muncha alegriya i orgolyo. El mansevo estava orgolyozo por ke paso de la kriyatureriya a la maturidad, los paryentes estavan alegres de ver sus ijo engrandesido, los envitados estavan alegres de partisipar a esta fiesta relijyoza muy emportante. Todas las karas riyentes, todos orozos, eyos ke tengan bien i mozos tanbien.
El “must” de las Bar Mitzvas son los deskorsos siguro. Kada ijiko deskorsa asigun la perasha de akeya semana i asigun sus sintimientos. Despues del deskorso tradisyonal del mansevo, el Rav Naftali Haleva mos avlo sovre la tema de la fiesta, ke era la “MANSANA”… Vos kero dizir ke en el büfe de despues de la Bar Mitzva ofresieron i una mansana a kada uno de los envitados. Agora vos kero kontar lo ke mos konto el Rav Haleva, ke me plazyo muncho.
En una shara (orman) aviya munchos munchos arvoles. Esta shara era una shara de munchos anyos, de sorte ke todos los arvoles eran godros i altos. Las puntas de los arvoles kaje ke ya estavan serka del sielo. I... Entre estos arvoles somptuosos se topava tambien un arvoliko de mansana. Este arvoliko estava siempre muy triste. Se selava de estos arvoles altos. Por ke kuando el tiempo se eskuresiya i ampesava la noche, en lo ke mirava al sielo, viya ke las estreyas estan briyando ensima sus puntas. I despues se metiya a arogar al Sinyor Del Mundo. “O, Dio miyo! Ensima de todos estos arvoles estan briyando munchas estreyas. Ke ay si i ensima de mi se topava al menos una estreya”.
Ansina pasavan los diyas de el arvoliko de mansana. Kon selo, kon tristeza i kon arogar.
Un diya ke ya aviya peryido esperansa el arvoliko, arogo por la dalkavo ves, kon fervor i kon grande dolor en el korason, ke i el tanbien dezeya de tener, al menos una estreyika ensima de el. Ampeso akel momento un ayre fuerte i le kayo una de sus mansanas en basho i se rompyo en dos. Ma no de ariva para abasho, se rompyo justo de en medyo orizontalmente. Kontinuo a kesharse, “No abasta ke no me das una estreyika, me azes kayer mi mansana?” Se oyo una boz komo turguelo… dizyendo… “Mira en basho!” El arvoliko miro en basho, a la mansana partida en dos… “Ke estas viendo?” “Mi mansana”. “Mira bueno! Mira la estreya ke se topa djusto en medyo. Es la estreya de aryentro de ti. Tu estas bushkando las estreyas de ensima de otros arvoles. Ma la tuya esta aryentro de tu korason. Kada uno tiene una estreya en si. Kale verla i no dezeyar la de enfrente.”
Ansina se eskaparon los biervos de el Rav Haleva. Esta konsejika kontiene grande sinyifikasyon. Ansina ke munchas vezes no mos rendemos kuento de las valores ke tenemos, i miramos a lo ke tienen los otros. El buto es de topar en mozotros esta estreya, i valorizarla para azermos buena persona, azer buendades para un mundo yeno de djustisya i buendad.
