La luna syempre djugo un rolo santral en el djudaismo desde la konsepsyon del tyempo. El kalendaryo djudio en realidad se yama “lunaryo” i tyene una baza lunar mas ke solar. Los mezes pueden ser 12 o 13 i las datas de los muedes se kalkulan sovre esta baza.
Una orasyon spesyal es dedikada a la luna, el “birkat halevana”, ke se melda despues del 7 i el 15 del mez ke koresponde a su peryodo de kresimyento, i ke semboliza el puevlo djudio en la istorya: kuando empesa a dezapareser, de otra parte esto es el kresimyento de muevo. Los savyos del Talmud tanbyen eksplikan ke la renovasyon de la luna kada mez mos akodra la grandeza de la kreasyon del mundo i la prezensiya divina ke, aunke en vezes se eskonde, syempre torna i sale en medyo.
De otra parte, el djudaismo asosya la luna i sus siklos kon la mujer. El primer diya del mez djudio se yama Rosh Hodesh i marka la aparisyon de la luna mueva. Lo ke no todos saven es ke este diya se konsidera una verdadera fyesta dedikada a las mujeres. Por ke? Fueron presizamente las mujeres ke no entregaron sus joyas para idolatrar la vaka de oro kuando Moshe estava en el Monte Sinay para resivir las Tavlas de la Ley. Por tanto, este akto fue rekompansada kon un diya de selebrasyones kon diferentes tradisyones komo abstenerse de syertos lavoros o arekojer paras para las ovras sosyales.
Finalmente, mos akodraremos ke desde la antiguedad, los djudios se enteresaron en la astronomiya: uno de los eruditos mas importantes fue Shabbetai Donnolo, un mediko, farmakologo i astronomo de Apulia en la Italya de la Edad Medya. La medisina i la astronomiya se enkontran en el estudio de la influensiya de las konstelasyones i las planetas en kada organo o parte del puerpo umano.
Meldamos en el primer livro de la Tora, Bereshit: “El D”o kreo las dos grandes luzes, la luz grande para governar el diya i la luz chika para governar la noche i las estreyas” (Bereshit 1, 16).
La primera parte de este verso eksplika ke D”o kreo las dos luzes de igual dimensyones, ma en la segunda parte del verso, la luna se deskrive komo la luz chika i el sol komo el grande.
El grande komentaristo bíbliko Rashi, ke bivyo entre 1040 i 1105, interpreta ke la luna se aviya keshado al D”o en esperando ke va amenguar el briyo del sol, dizyendo: “Es posivle ke dos reyes tengan la mizma korona?”
Ma achakes de mankura de umildad, la luna no topo lo ke kijo del sol i se amenguo.
Ma antes de oyir sus keshas, D”o para konsolarlo le prometyo ke su luz iluminara el diya i la noche, ke los mezes i el kalendaryo se bazaran en eya i ke el puevlo djudio se iva ambezar komo eya se va enchikeser i agrandeser. Ma la luna no fue konsolada.
El midrash mos dize ke D”o aviya dicho: “Traye un sakrifisyo de ekspiasyon para mí, por aver enchikesido la luna”. Este se deve entender komo una parte de su kastigo a la arrogansa de la luna. İ de otra parte meldamos “la luz de la luna sera komo la luz del sol” (Yeshayahu 30, 26) a la fin de los tyempos!.
Este kuryozo midrash puede enspirarmos a entender la istorya de las grandes mujeres del djudaismo, ke tuvyeron altas i bashas en sus vidas, ke sus luzes en syertos tyempos se enchikesyeron ma para ser despues komo la luz del sol: miraremos por egzempiyo a las vidas de las mujeres bíblikas komo Miriam, Ester, Deborah, de las djudias de la istorya komo Dona Gracia i Bienvenida Abravanel.
Ma los savyos mos ambezan, ke komo en el tyempo del Egzodo, los djudios reusheron fuir de Ejipto grasyas a sus mujeres iluminadas (“nashim tzidkaniot”), en el tyempo de Mashiah, las mujeres i spesyalmente la luz de la luna van a tener un rolo importante para salvar la umanidad.
Transladado i adaptado del bulletin de MEIS (Museo Nazionale dell’Ebraismo Italiano e della Shoah).
