Una mujer manseva de 38 anyos ke se yamava Emine Bulut fue kuchiyada i matada, por su ex-marido, delantre de los ojos de sus ijika de 10 anyos. Este krimen de mujeres dalkavo, revolto al puevlo, a la presa i a los politikos.
Lo mas triste, ke mos endjido el korason fue ke la poveretika, antes de murir ampeso a dizir “No me kero murir” i su ijika yorando estava rogando a su madre “Te rogo mama, te rogo, no te mueras.” Ken puede detener sus lagrimas delantre de un tablo semejante?
Komo vos eskrivi ariva, ampesando de muestro prezidente, los politikos kondanaron este akto, el djuzgo manejo rapidamente i este monstro en forma de persona va ser kondanado a una penalita de “prision para la vida entera”.
Komo todas las mujeres del mundo entero, este modo de evenimientos me aze pena i a mi tanbien. Sovre todo ke este ombre esperando ke va benefisiar de una reduksyon de penalitad, se defendyo en diziendo ke su mujer biviya una vida impropriya, esta revoltando al puevlo.
Una avokata disho ke este modo de personas ya se ambezan de mas antes, ya se aprontan de mas antes para topar este modo de ekskuzas, ke pensan ke los van a salvar.
Verdad ke kada diya vemos este modo de asasinatos. Malorozamente en estos anyos dalkavo vemos ke munchas personas se formaron kon un “reflekso de matar”. Seya en la sirkulasyon del trafiko, seya en la vida de kada diya, vemos ke matan a djente muy fasilmente. En la mas chika diskusyon, ya sale pishin un kuchiyo, una arma o un palo para atakar al denfrente. Esto amostra ke de antes ya estan preparados o ya tienen entisyon de kitar una bela, “kuando viene el tiempo”. Kuchiyo i palo ya se entiende komo se obtiene. Ma komo obtienen estas armas? Komo disho Nasreddin Hodja, el ken da las paras, tchufla el tchuflete? Tanto kolay es?
En un mas chiko konflikto ya sale la solidaridad de las tribus (aşiretler) o de los kompatriotes (hemşehri) en medyo.
Tanbien todos los kanales de la televizyon azen yarish para amostrar filmos de matansinas i sangres i armas. En kada eroe de filmo se topa una arma, pronta para matar.
Para evitar este modo de evenimyentos, emprimero kale una edukasyon buena de la famiya. Despues kale dar lesones de moralidad en las eskolas, kale tanbien ke los produktores de filmos i serias de televizyones ke deshen de travar filmos kon violensias. Kale ke las leyes de penalidades seyan agravadas.
Estamos en perikolo la umanidad entera.
No penso mas ke dizir “inshallah” para tener diyas mas klaras, kalmas, sin sar i sin mal.
