Noche de Alhad estuvimos en el Klub Anadolu de Büyükada i asistimos al resital de piano de la famoza manseva, Renan Koen. Pensi a eskrivirvos “la famoza pianista” ma vide ke solo pianista estava una kalifikasyon muy flaka. Eya es pianista, kompozitora, soprano i muzikoterapista. Renan ampeso de 12 anyos a ambezarse fluta. En mizmo tiempo lavoro kon diversos famozos piyanistos. Despues ke se graduo de la “Klasa de fluta” en la Universita Mimar Sinan, se fue a Paris a estudiar piano. En los anyos 1990, kontinuo estudiar pedagojiya en Londra.
En 1995 gano el kuatren premio en el konkurso de “Chopin Etüd”. El mizmo anyo gano el sigundo premio kon su performansa en la ovra “Improvizasyon” del konkurso “Cemal Reşit Rey”. No eskapa la lista de sus estudios ni de sus performansas en el mundo entero. Komo Gresya, Portugal, Austria i mas. En 2012 ampeso a tomar lesones de “chant”.
Renan Koen arekojo dokumentos sovre los ke estavan emprizonados durante la Sigunda Gerra Mundiala en el kampo de Terezin i los enrejistro en DVD para el Muzeo de la fundasyon de los 500 anyos.
Lo mas ke me plazyo en meldando el programa del resital es ke desde 2015 Renan ensenya el Olokosto, a los mansevos non judios, seya de aryentro o seya de afuera del payis. Eya yeva kada anyo los estudiantes al kampo de konsentrasyon de Terezin i a los ghetos, kon el movimiento ke se yama “Marcha de la Muzika”.
El konserto ampeso a las 19.00 kon la Sonata No. 23 de D. Scarlatti i Arabesk op. 18 de R. Schuman. En la tresera ovra fue akompanyada de Sedef Erçetin chellista. “Asma Asmaton, Matthausen”. La “kantika de las kantikas” una ovra muy triste de Mikis Theodorakis. Konta ke un mansevo bushka su kerida despues del Olokosto “Ke ermoza era mi kerida, teniya un fostan de kada diya i un peyniziko en sus ermozos kaveyos… La vitesh? Ijikas de Auschwitz, ijikas de Dachau… Puedeser ke mas no tiene fostan de kada diya i no tiene mas este peyniziko en sus ermozos kaveyos… Ijikas de Belsen i ijikas de Matthausen, vitesh a mi kerida? -La vimos en una foto. Teniya un numero ensima su braso blanko i una estreya en su pecho. -Pekado ke dingunos no supo ke ermoza ke eya era.
Despues de esta kantika oyimos dos “preludas para piano” kompozada por Ali Darmar.
I vino la sira de las kantikas sefaradis. Tres ermanikas eran, Morenika me yaman, Dos amantes tengo mama, Mi alma Triste, Pasharo d’ermozura, Balat kapusu (la kanto tambien). Estas kantikas las enterpreto asigun eya mizmo. En los maftirimes fue Renan akompanyada por un chello i un tanbur de Özata Aydın. Kantika para Rosh ashana i kantika para Hanuka i una otra kantika “Teslim” ke dediko para su padre. El konserto eskapo kon “Istanbul Süiti” ke era tomada de la kantika sefaradi “La vida do por el Raki”.
Palmas i palmas siguro. Esto es lo ke vos pude kontar del konser de Renan Koen ma no vos pude kontar la emosyon i la satisfaksyon de muzika ke tuvimos akeya noche.
Este konserto ke tenga ermanos… Bravo Renan !!!!
