El jurnal Trend de Azerbaycan informa ke se esta erijyendo un monumento en el distrikto Narimanov de Baku, la kapitala de Azerbaycan, para onorar el eroe nasyonal, Albert Agarunov.
El monumento se esta erijyendo en el bulvar ke tyene el nombre del eroe i la avyertura del monumento va ser en los mezes vinyendo, esrikivyo el jurnal Trend.
Ken es Albert Agarunov?
Agarunov nasyo el 25 de Avril de 1969 en el kazal de Amirjan en el distrikto Surakhani de Baku. Su famiya era djudia i teniyan 10 kriyaturas. Antes de entrar a la armada de Azerbaycan sirvyo en la armada sovyetika en Georgia komo komandante de tankes de 1987 a 1989.
En 1991 Albert se enlisto voluntariamente en la armada de Azerbaycan para partisipar en la gerra de Karabag. Agarunov fue nomado komandante de un batalyon de tankes i partisipo a la gerra en la primera linea del fronte Shusha. Durante las batayas en direksyon de Khankendi, Dashalti i Jamilli, destruyo una grande kantidad de soldados i ekipamento enemigos.
Durante el asolto a Shusha, en 6 Desembre de 1991, Albert Agarunov i su shoför Agababa Huseynov destruyeron solos 9 tankes, 7 vehikulos blendados i munchos otros ekipamento de la armada Armeniana.
Durante otra eskarmusha, Agarunov reusho a dezarmar dos tankes empleyando una taktika ke los amigos de Albert nomaron “sandwich djudio”.
Albert fue bushkado por la armada armeniana i el governo de Armenia metyo un premyo de 5 milyones de rubles para el ke va trayerlo bivo o muerto.
Agarunov muryo en el kampo de bataya kuando una bala de un frankotirador/sniper lo chafteyo en la kavesa el 8 de Mayo de 1992.
La madalya de Eroe Nasyonal fue presentada personalmente a la ermana de Albert, Sofiya Mammadova, personalmente por el líder nasyonal de Azerbaycan de akel tyempo Haydar Aliyev.
Despues de su muerte eroiko, Albert fue onorado munchas vezes, una eskola en Baku yeva su nombre, i en 2017, se erijio una plaka i su busto komemorativa en frente de su kaza.
Albert Agarunov esta enterrado en Baku en el Pasaje de los Martires i Eroes. Este anyo Albert iva tener su 50en aniversaryo.
