Sir Moses Montefiore (1784-1885) tuvo un impakto ekstraordinaryo en el mundo djudio.
Desde ke tuvo la intensyon de entrar a la borsa, Montefiore gano kon fasilidad una de las 12 lisansias de korredores permitidas a los djudios en la Borsa de Londra. Kuando Montefiore se retiro del negosyo teniya 40 anyos, ya era un ombre riko, uno entre los mas rikos de Ingletierra.
Los aktos i lavoros filantropikos de Moses Montefiore i su esforso a dar un paso adelantre para defender sus korrelijyonaryos le izyeron ganar grande admirasyon i fama. Izo todo en su poder para liberar los djudios sirianos ke fueron imprizonados en Damasko por un libelo de sangre i despues se fue a la Rusia para rogar al Tsar por ser enduljente kon los djudios rusos. Fue visto por el mundo djudio komo su protektor i lider.
Montefiore i su mujer Judith, apoyaron institusyones djudias i no djudias en Ingletierra. En Ramsgate, ande biviyan, fraguaron una sinagoga i una yeshiva sefaradi.
Montefiore es mas venerado por sus lavoros de byenfezensya en la tyerra de Israel, ke personalmente vizito 7 vezes. Ayudo i apoyo la industria i la edukasyon, ma tambyen bushko remedyos para ke los djudios de Israel fueran mas autosufisyentes. Entre los famozos esforsos de Montefiore se topan el molino de Yemin Moshe i la konstruksyon del distrikto de Mishkenot Sha’ananim. I lo importante es ke estos dos lugares eran los primeros a ser afuera de la sitadela vyeja de Yerushalayim.
Djudio sefaradi, la observansya de la relijyon djudia de Montefiore se enfortesyo kon su amor a la Tyerra de Israel. Era konosido por viajar kon su fayton tenyendo al lado su propyo Tora, su shohet i yevando kon el su komida i chinis para observar la kasherut.
Montefiore fue nomado shovalye por la reyna Victoria, sirvyo la Reyna komo sherif de Londra i fue presidente (1835-74) de la asamblea de deputados de los djudios britanikos. En 1846, resivyo el titolo de baron. Sir Moses Montefiore muryo solo unos kuantos mezes antes de kumplir 101 anyos, el 13 de Av, 1885.
