En Purim pasado eskrivi, Purim Purim lanu, Pesah en la mano… En Pesah eskrivi, Ya vino enverano para irmos al kampo o a las kampanyas… Na ke ya eskapo i el enverano en un punto. Komo dizen en Turko “asta ke serramos i avrimos los ojos”.
Las kalores me tokan muncho a mi, a la kontra de mi marido. Me parese ke no esto puedyendo tomar reflo. Ma este enverano no tuve dinguna kesha de las kalores. Siguro ke ya uvo diyas kayentes, ma ke azer? Enverano es, lo suporti. Ma en total tuvimos un enverano muy agradavle, kon un poko de ayre ke no mos desho sintir muncho las kalores. I las luvyas fuertes tanbien arefreskaron el klima. (Aparte los seles ke izieron munchos danyos.)
Este anyo el mez de Eylül kon el mez de Elul vino en mizmo tiempo. Ya es la fin del enverano. Elul mos da haber ke estan aserkandosen los diyas santos muestros ke son Rosh Hashana, Kipur i Sukot.
Las izlas ya se vazyaron, ya no kedo kaje dingunos. Los ke tienen ijos en las eskolas ya se fueron a la sivdad. Las sigonyas (leylekler) ya ampesaron a gruparsen en azyendo tornos en los sielos para bolarsen a los payises mas kayentes, komo ke si keren saludarmos para augurarmos un buen invyerno.
Las kalejas de Büyükada estan vaziyas i kalmas. A parte del debarkader ke esta entre el diya yeno de turistos, los 90% arabos. Ma mozotros en muestras kazas i en las guertas tenemos el plazer de gozar el kalmo del silensyo.
Otra koza buena es ke estos turistos etranjeros o del payis ya ampesaron a aminguarsen. Los ke vienen a Büyükada azen kolas largas para azer el torno de la izla kon los faytones. Los kocheros kitan la alma de los kavayos poveretikos para eskapar el torno una ora mas presto i tornar a tomar otros mushteris para ganar mas munchas paras. Los mansevos alkilan bisikletas. Ya saven ya no saven komo enbinarsen. Por esto siempre ay aksidentes ke en vezes se entran aryentro de las arabas i los kavayos. Aparte de estas bisikletas lokas, estos anyos dalkavo ampesaron las motosikletas ke lavoran kon elektrisita. I akeyos azen un kaos en las kalejas de la izla, ke mozotros no savemos por ande kaminar.
Los tiempos ya se trokaron. Las demanyanikas i las tadres estan freskitas. Las noches mos metemos una mantika demaziya, tenemos siempre una jaketika a muestro lado. Agora es la sezon de kaminar i de respirar el aver puro i fresko. En indomos a los chames mos se inchen los pumones de oksijen i de las golores de los arvoles. Ansina es el resiklado (devri daim) de la natura, malgrado ke se esta trokando el klima del mundo.
El otonyo da enspirasyones a munchos poetas i kompozitores. La fin del enverano mos da una tristeza i en vezes depresyon, de pensar ke ya viene el invyerno ke es una sezon larga kon las luvyas i las inyeves. Ma sin el invyerno no puedemos apresyar el enverano.
Sanedad ke ayga…
