Kuando vyene el mez de septiembre es vedra ke los diyas se akurtan, los arvoles empesan a verter las ojas, la natura muere ma seya en el pais seya en muestra komunidad las aktividades se arebiven. I empesan las ekspozisyones, los teatros, filmos muevos, los kursos ets.
Por empesar, el 6 de oktubre estamos envitados de la parte de SİLVYO OVADYA, benefisyo al muzeo djudyo para dar un konserto de musika turka (TÜRK SANAT MÜZiĞİ) en el Neve Shalom a la ora 15.30 kon el konduktor CEMİL SAĞYAŞAR. Si tenesh plazer emprimero vijitash el muzeo i despues vos alegramos kon las kantikas byen konosidas.
Al 24 de Novembre vamos a fyestar komo kada anyo, el AVRUPA YAHUDI KÜLTÜRÜ GÜNÜ. Un diya yeno de aktividades kon komidas sefaradis i por siguro komo kada anyo, a la fin del diya vamos a representar una boda djudiya muy elegante.
Al 16 del mez de febrero 2020, vamos a fyestar el Diya Internasyonal del Judeo-Espanyol/Ladino (DIDL). Akel diya tenemos envitados de otras sivdades ke van a avlar el Ladino, anekdotas, kantes. El otro anyo si vos akodrash, izimos una inovasyon i aparejimos un chiko teatro (LOS MACHUKADOS) ke plazyo muncho i estava tan divertido ke todos se pisharon de la riza. Desde ke plazyo i mozos la trupa del teatro desidimos de azer de muevo una skech muzikal, eskrita por FORTİ BAROKAS kon los djugadores del vyejo DOSTLUK YURDU DERNEĞİ ke no me manken porke todos semos amorozos de la shena, nombrada (LOS REKUERDOS) muy alegre.
Keridos lektores, no ay asentar en kaza; para todos ay aktividades i entretenimyentos. No tenesh de pensar oy kualo va azer, no tengo dingun echo lo ke tenesh de azer es un telefoniko a los relasyonados i eyos vos van a dar notisyas de todas las aktividades.
HATIMA TOVA.
