Una de las partes umanas de muestra relijyon: perdonar i demandar pardon.
Munchos pensan ke las dos palavras mas difísiles de dizir son: “pardona/ekskuza me”. En verdad, todos savemos ke importante son estas dos palavras. Dizir ke te aze pena, o a lo menos admitir tu kulpa, es una parte kritika del proseso de “teshuva”, arrepentimyento.
Igualmente importante es la kapasidad de sintir las diskulpas de otras personas i akseptarlas. I mas grande i mas importante es la kapasidad de renunsyar enteramente a una diskulpa i simplemente perdonar a una persona por azerte danyo, por azerte pena.
La tradisyon djudia ensenya ke una persona es ovligada a demandar pardon tres vezes. Despues de tres refuzos, la persona ya no es mas responsavle de su mal-kondukta, de su yerro i mal-komporto, porke esto es konsiderado komo un verdadero arrepentimyento. El ke no aksepta una diskulpa sinsera despues de tres demandas de pardon agora es kulpavle de tener garez i sintir aborresimyento.
Kualo es de malo de sintir aborresimyento o tener garez kontra una persona ke realmente te izo mal, te izo pena? De una parte este akto es eksplisitamente defendido en la Tora (Leviticus 19:18), de otra parte tener garez i sentimyento de aborresyon afekta psikolojikamente a la persona. Una persona ke tyene garez a una persona es, en jeneral, mas poko orozo en la vida, no tyene relasyones buenas kon el mundo i kon otras personas porke no puede olvidarse el sentimyento de ser arrebashado.
La demanda de pardon i perdonar, de otra parte, es bastante fasil. I kuando se aze kon sinseridad, es komo un regalo para mozotros i para la persona ke perdonamos.
