La famiya es el sentro de muestra sosyedad ande nasemos, mos engrandesemos, rankontramos proteksyon i seguridad. Muestras famiyas son una parte muy emportante de muestras vidas. Mos ayudan a amijorear muestra personalidad i a formar muestro karakter, mos ensenya la valor del amor, de la kerensya, de la onestedad, de la konfiensa i mos asegura kon esto la reushidad en la vida.
La famiya es un lugar ande puedes ser tu mizmo. Es un lugar ande te akseptan komo sos, kon tus manyas buenas i negras. Es un lugar kuando tyenes difikultades en el kamino de la vida, todos estan prontos para ayudarte. Te ayudan a kontinuar la vida mas o menos mas fasilmente.
Ma malorosamente, ay unos kuantos anyos ke syertas famiyas peryeron las valores familyares. El dor troko, los mansevos estan lavorando komo esklavos, sin tener oras djustas de terminar el lavoro. Es una manera terrible de lavorar fina las 12 de la medya noche, los shabates, los alhades, mizmo los dias de las fyestas para syertos, siguro ke no para todos. Dunke los mansevos no tyenen tyempo de versen mizmo marido i mujer. La una esta salyendo demanyana el otro esta entrando. Yo penso ke la vida esta muy difisil para los mansevos, para los ke tyenen kriaturas chikas.
Aki en Estambol si no ay mosas u la ayuda de las madres, los chikos no se pueden engrandeser komo kale. Las madres estan lavorando i estan vinyendo kansas del echo. Siguramente no tyenen fuersa de azer nada. Solamente dar ordenes a la mosa u a la madre.
Malgrado esta vida akosada, las madres estan penando a arekojer los ijos, las ijas, los grandes de la famiya, los inyetos, las noches de Shabbat, en las fyestas para ke todos tengan una komunikasyon entre eyos. En una famiya djudiya es la madre, la mujer ke tyene este dover de dar una edukasyon komo kale a los ijos, inyetos mizmo en esta vida loka…
En una famiya devemos de tener kompreansyon, responsabilidad, unyon, pasensya, respekto, dialogo kon todos i tratar endjuntos los problemas para ke seyan mas fasil a suportar. La abilidad de ser una buena famiya se ve en la formasyon i edukasyon de sus ijos. El dover de un padre i una madre es dar a los ijos un buen egzempyo para ke en el futuro eyos tengan una buena famiya.
La famiya konstruye el futuro de los chikos ke se ambezan las primeras valores, prensipyos i nosyones de la vida ke los dirijan. Por otra parte la famiya da la posibilidad de komunikar kon el den frente ke esto es muy emportante para adaptarse a la sosyedad ande biven otras personas.
Por terminar kero dizir ke la famiya es muy emportante, es un apoyo uniko, ayuda a kreer una mijor sosyedad. Una famiya es el egzempyo perfekto de una sosyedad kompleta. Mos ambezamos a bivir kon otras personas, para kompartir opinyones diferentes, eksperyensas i ambezarmos munchas otras ideas.
