Eskriviyamos letras. Letras de amor, letras por echos, letras de askerlik, letras a las famiyas o amigos ke estavan leshos. Se eskriviya la letra en una oja, en vezes blanka, o de kolor, en vezes dekorada kon flores o korasones. Se metiya aryentro de una anvelop, se iva a la posta, se apegava uno o dos tembros i se echava al kuti apropriyado. Seya kon avion o seya normal. Esta letra asta ke se iva ya pasava tres diyas para aryentro, o una semana al menos para afuera del payis. El ke resiviya la letra si era un kerido, la meldava una ves, dos vezes i mas, kon grande eskarinyo. I despues se metiya a eskrivir kon la mizma prosedura. En vezes despues ke se eskrivio la letra, no se puediya mandar el mizmo diya, kedava unos dos diyas en kaza. Ansina se tomava haberes “non freskos” dizeremos. Los postadjis eran muy presyozos. Todos konosiyamos a los postadjis del kartiye. Lo saludavamos, le demandavamos si ay alguna letra para mozotros, porke el mos konosiya i tanbien saviya ande moravamos. Indimas si estavamos asperando algun haber, lo asperavamos en las ventanas komo si asperavamos a muestro amante. En turko ay una kantika ke todos la saven.
“Mira! El postadji ya esta viniendo, i mos esta saludando, todos lo estan mirando i se estan merikiyando. Munchas grasias a ti postadji, por trayerme ermozos haberes…” Dizen ke el postadji sona las puertas dos vezes. Mas no! Agora, ken konose al postadji? Sovre todo en las sivdades grandes. El postadji no traye mas letras, solo fakturas. Las echa al kuti de letras i se va komo ke si se fuye de la verguensa.
Viniendo a las letras. Ke letras mas no kedo ni letras ni tiempo. En primero salyo el telefon. Avagar o presto, karo o barato ya se estava puedyendo tomar haber de los keridos mas presto ke kon las letras. Despues salyeron los selulares. Aman aman! Ni un punto sureya de tomar haber. Desparte de tomar haber, mos vemos direktamente. Te eskarinyates? Pishin un telefoniko, hop ya esta tu kerido, tu ijo, tu madre en frente de ti. Ke maraviya!
El mundo se izo un mundo de rapidez, de prestura. Dingunos no tienen mas pasensya para asperar. Mizmo en el trafik, todos keren pasar adelantre para irsen mas presto. Ya se asendyo la luz vedre, ya ampesan a sonar los klaksones para dizir: “Ayde kamina!”. Eskapo la pasensya de antes… Ken tiene pasensya agora, de resivir la repuesta de su letra, despues de un mez. Barbinnam!
Keridos amigos, esta semana estamos fiestando Sukot. Es la dalkavo de los “Shalosh regalim”, de la fin de los diyas santos. Mos vamos akodrar de los 40 anyos ke pasaron muestros padres en el dezierto, despues ke se salvaron del esklavaje en Ejipto. Vamos a dekorar las sukas, vamos a komer biskochos i borekitas kon uvas i agranadas. Mos asentaremos kon amigos i keridos en las sukas kon alegriya. A la semana ke viene vos va avlar de la fiesta proksima, Simha Tora.
HAG SUKOT SAMEAH!
