La semana pasada, un error tekniko kavzo ke el artikolo de muestro amigo Metin Delevi no se publiko. Lo publikamos esta semana kon muestras ekskuzas sinseras.
Ayer eskapimos la fyesta de Sukkot. Me apersivi ke munchos mansevos i afilu munchos de mi edad no konosen syertos uzos des Sukkot. Una de las razones los mas importantes es ke estamos bivyendo en apartamentos sin guertas ande se uzava montar la Suka.
Kero relatar syertos detalyos sovre un uzo de Sukkot: Ushpizin.
Durante la fyesta de Sukkot, la Suka es konsiderado komo muestra kaza, una kaza mueva para 8 diyas. Por egzemplo, dado que normalmente las noches komemos en muestra kaza, en Sukkot se uza komer en la Suka. Ma komo la Suka es una kaza temporaryo, mudarse a la Suka kijo dizir deshar syertos konfores de muestra kaza i algunas de muestras komodidades materiales i kontentarmos kon syertas nesesidades mas bazikas, kreando ansi un doredor i ambiyans mas spiritual.
En muestras “mini-kazas” spiritualmente mejoradas, la tradisyon djudia de ospitalidad i invitar musafires toma una dimansyon kompletamente mueva. No solo invitamos a amigos, konosidos i vizinos a unirsen a mosotros, sino ke tambyen egziste el uzo de invitar a los grandes personajes djudios istorikos ke dyeron forma a muestro puevlo kon sus egzempyos.
Este uzo de invitar personajes de muestra istorya se yama Ushpizin. Ushpizin en Arameo sinyifika musafir, invitado, kombidado.
Segun la Kabala, la tradisyon místika djudia, la Shehina (Prezensya Divina) akompanya a todos los djudios en la Suka. La Shehina esta akompanyada kon los siete lideres grandes de Israel: Avraam, Itshak, Yaakov, Moshe, Aaron, Yosef i David.
Kada noche, se sueta la bienvenida a uno de los siete ushpeezin (invitados) a la Suka en dizyendo: “Invito a mi meza a los invitados eminentes, onoravles: Avraam, Itshak, Yaakov, Moshe, Aaron, Yosef i David. Ke seyash el bienvenido, Avraam, mi invitado onoravle i ke todos los invitados onoravles esten aki kon mozos i kon vozos: Avraam, Itshak, Yaakov, Moshe, Aaron, Yosef i David.”
Kada noche, otro de los ushpizin es bienvenido, en un orden spesifiko. Ansí, en la segunda noche, se dize: “Ke seyash el bienvenido, Yitzhak, mi invitado ...”. En la tresera noche: “ Ke seyaj la bienvenida, Yaakov, mi invitado ...” i ansí suksesivamente durante toda la semana. Ma el orden de Ushpizin puede trokar segun la komunidad. I en syertas komunidades se inkluye a esta lista de nombres los nombres de muestras Madres.
