Anoche fiestimos dos evenimyentos orozos. Eran los kumpleanyos de mi ija la chika i de su esfuegra. Estavamos en un restorante ke se topava en el dalkavo kat de un gratsyelo (gökdelen). Ya vos imajinash la vista. Paresiya ke estavamos en un avion. Se viya el Bosfor entero, kon los dos pontes iluminados. La mar Marmara se viya komo un espejo ke refleta lo ke se topa al entorno. Estos pontes atan las dos partes de la sivdad ke se topan en los dos kontinentos, se viyan komo kolyes de perlas i piedras presyozas. El panorama estava verdadmente maraviyozo. Estambol es una sivdad muy ermoza, de diya komo de noche.
Kuando salimos afuera, ya estava la ora pasado de onze. Los kafes ke se topavan al entorno estavan yenos de mansevos asentados, ijos i ijas avlando i riyendo. Un poko mas ariva aviya un meydan, i komo el tiempo estava ermozo, los mansevos estavan kantando i baylando.
Esta vista mos vino muy bueno. Mos se ennalteso el moral. Porke en estos diyas dalkavo lo ke oyiyamos era las gerras, las matansinas i haberes de “la tresera oja de las gazetas”. Matar mujeres komo komer pipitas. Siguro estos krimes se ve mas muncho en las partes mankas sivilizadas de las sivdades. Komo en kada grande metropol de los payises del mundo. Ma no ay otro remedio. Komo dizen en turko: “El ken kere bien la roza, aksepta i su espina”.
En estos diyas de la fin del mez de Oktubre, ya estamos ampesando a sintir las patadas del empesijo del invyerno. En serka ya ampesamos a ver las luvyas, los tiempos yelados i puedeser inyeves. Ya van a ampesar a vinir las faturas kargadas de gas. Lo djusto, estos tiempos ke se yaman “pastırma yazı” (enverano de pasturmas) mos agradan muncho. Kale ke arogemos i para diyas de luvyas, para ke se inchan los barajes para tener agua. La agua es “vida”. Por manko de luvyas Estambol tiene solo 175 diyas de agua. Arogamos en la fiesta de Shemini Atseret ke el Dio mos mande luvyas “Tefilat ageshem”. Luvyas kon karar, ni muncho para ke se transformen en seles, ni poko para ke la tierra no se arte.
No mos olvidaremos ke despues del invyerno i los diyas yelados, vienen los diyas agreavles de la primavera.
Vos auguro un buen mez de Novembre i tanbien una invyernada buena kon sanedad.
