SU BUTO: Ayudar i transpozar la enerjia i la teknolojia de su payis a los mansevos de la Afrika.
Sivan Ya’ari nasio en 1978 en Rishon LeZion, Israel.
La famiya desidio de enstalarse en Fransia. Sivan tenia 18 anyos kuando retorno a su payis natal para azer el servisio militar.
“Kuando vijiti por la primera vez los kazales de Afrika, los proves me izieron pensar a mi chikez. Kije krear una inovasion. Mi motivasion me yevo a estudiar la Finansia en Pace University i mas despues el Master en la Administrasion de Enerjia en Colombia University.”
En la Afrika no avia ni ospital, ni doktor, ni elektrisita, ni mizmo en las eskolas.
Eya supo, kon su enerjia, importar los paneles para krear i aklarar las institusiones vitales.
Enkontro un otro problem: La non egzistensia de elevos en las eskolas...
En kurto tiempo se ambezo la razon:
Avia agua no muy serka de los kazales, para ir i inchir bidones.
Malgrado ke no era limpia, se asperava kaji una ora para un bidon solo...
Las kreaturas kargadas de esta mision mankavan de ser prezentes en las eskolas.
Tambien no se puediya profitar de la tierra para kultivarla...
Aser ke Sivan penso, kon su enerjia divina, a realizar los pozos Artezyen i el montaje de pompas de agua. La agua limpya vino en poko tiempo a las kazas...
Oy kon la teknolojia israeliana (gota a gota) i la tierra fertila, se realizo el mirakolo: Se esta mizmo vendiendo lo ke se kultiva...
En 8 paizes de Afrika i 104 kazales tienen la agua i la elektrisita.
INNOVATION AFRICA ke se kreo en 2008, izo ayudar a 1 milion de Afrikanos:
Cameron, DRC, Ethiopia, Malavi, Senegal, S. Africa, Tanzania, Uganda.
Sivan Ya’ari es la kreadora i el GEO de la Innovation: Africa.
Kazada i madre de 3 ijos, fue nomada entre 50 mujeres inovatrisas (el periodiko Forbes Israel).
Grasias a la teknolojia de Israel, SIVAN YA’ARI ke obtuvo premios inombrables de las Nasiones Unidas, se dediko al dover siviko de ayudar.
“Pensi a mi chilkez: Yo ERA PROVE... MA LAS KREATURAS AFRIKANAS NO TIENEN REALMENTE NADA POR NADA!”
***
En la perasha de esta semana, BERESHIT- de Rav İzak Alaluf:
Mizmo despues de mas de 33 siglos:
Dizimos “Bereshit” i mos metemos a meldar i ambezar la Tora (sin dar interrupsion) i profitar de la luz de muestro uniko i perfekto Kreador.
Keridos lektores: Siempre Klaredad en los Korasones...
