İSAK ESKİNAZİ
A mozotros mos parese ke en la antikuedad solo los soferim (yazarlar) savian meldar i eskrivir. Edukar en eskolas i preparar los kriyos a la vida era un dover para los ke biviyan en grandes sivdades. En los kampos, los kriyos ke kresiyan, ayudavan a sus padres.
Kuando los kriyos se aziyan jovenes, tomavan el posto de su padre, ke se konsiderava komo el patriarka. De esta edukasyon se aprovechavan solo los ijos. Las ijas se preparavan para kazarsen, tener kriyaturas i kuidar el ogar.
Entre los kriyos ke nasiyan, las ijikas tenian poko mazal para sovrebivir. Munchas vezes las deshavan en la kaye para ke se mueran de ambre si los parientes no tenian un revenido sufiziente para mantenerlas.
En la Gresya de la antikuedad los ijos de famiyas fortunadas, se ivan a las eskolas ande davan emportansya a la formasyon del puerpo komo a la formasyon del spirito. Ama en la isla yamada Lesbos (Midilli), una mujer de nombre Safo, eskrivyo munchas poeziyas. Eya diziya ‘el ombre es luzyo kuando lo miras, ama el savyo es siempre mas luzyo i bueno.’ ‘El oro es el ijo de Jupiter. Ni el pas, ni los guzanos no danyan el oro ke aktiva maraviyozamente la intelijensya de los mortales’. Eya eskrivyo poeziyas muy feministas i progresistas para su epoka.’
Los entelektuales de la epoka de Platon diziyan ke la edukasyon devia servir para formar los ke ivan a governar el payis. Ademas solo los ombres puedian ser sivdadanos i las mujeres no tenian ningun derecho de governar ni de votar. No olvidar ke mizmo la Fransya dyo el derecho de voto a la mujer despues de la sigunda gerra mundial, i la Suisa muncho mas tarde, en los anyos 1970.
Los chikos ke resiviyan una edukasyon eran ijos de dirijentes o ijos de la aristokrasiya. A parte de la kultura fizika, devian de ambezarsen las leyes de respektar a los parientes, a los dios i a los etranjeros.
Los mansevos sonyavan de ser komo los eroes de la Ilyada i Odisea de Homeros, de tener la maestria de la intelijensya i de la moralidad.
En el siglo de Sokrates, los filozofos eran los mijores maestros para dar esta ensenyansa a los elevos ke tenian una edad de 16 o 17 anyos. Los mansevos tanbien deviyan de prepararsen para ser buenos soldados. Oy en diya los soldados ke defenden un payis son jovenes ke tienen la sangre loka! La edukasyon ke se resiviya en kaza, la tenian de sus madres, de sus nonas, dadis o de los esklavos.
El lider de la famiya era el padre ke no tenia ninguna fonksyon en los lavoros de la kaza, ma mas ke todo se mesklava de la politika o de la vida militar. Kuando los amigos del padre veniyan a kaza, deviyan de reunirsen en una parte privada de la kaza, komo antes yamavamos “Selamlik”. En esta parte de la kaza solamente los ombres puediyan estar.
Las eskolas empesavan kuando el krio tenia 6 o 7 anyos. (Kaji komo en muestros diyas). Klaro ke no aviya eskolas publikas komo oy. Las famiyas se reuniyan para formar una eskola. Los ke dirijavan estas eskolas se yamavan “Paidagogos” o Pedagoges. Munchas vezes era un aedado o un esklavo ke ensenyava las buenas maneras de bivir: Komo kaminar en el kamino, komo vistirse, komo asentarse korektamente, komo estar silensyozo ets...
(a kontinuar la semana ke viene)
