Las tradisyones son uzos ke aserkan o atan el puevlo, seyan uzos relijyozos o seyan uzos nasyonales. Son tanbien folklorikos i kulturales. Kada puevlo i kada payis tiene su tradisyon spesyala. Kuando mos vamos a un payis diferente o kuando mos vamos a un grupo etniko diferente i vemos sus tradisyones, o mos viene koza mueva, o en vezes vemos ke tenemos i mozotros las mizmas tradisyones. Las tradisyones no son siempre atadas a las relijyones. Por egzemplo trokar de kaza, en dingun livro de ley no dize ke kale yevar un espejo, un dulse, levadura i un poko de polvo de la kaza vieja, a la kaza mueva. Ansina tenemos munchas tradisyones mozotros los judios sefaradis.
Vos kero kontar sovre la tradisyon de la “Kortadura de fashadura” de agora. Digo de agora porke kon el tiempo, komo troka la moda, se trokan las fiestas i las tradisyones, se “frankeyan” dizeremos. Komo munchas otras kozas i las tradisyones i los uzos se enspiran de otras kulturas. La fashadura muestra, uzo de los sefaradis, se yamo en los Estados Unidos i otros payises komo “Baby shower”.
Antes se fiestava este evenimiento en las kazas. Agora se fiesta en un lokal. Seya en un salon, seya en un restorante o seya en un cafe. Los tratamientos diferan si es kon komer a midi o si es kon un brunch. Se ofren los mas mijores tratamientos, no se kere dicho.
Se envitan todos los paryentes, amigos etc. Los musafires ke son solo mujeres, kale ke vengan verso las dos la ora. Porke la fashadura no se korta kuando eskurese. En la entrada, se apareja una meza kon alkonfites blankas i blus o roz, asigun el sekso del bebe. En la meza se topa tanbien un sesto dekorado, aryentro se mete unos kuantos metros de una ropa delgada de koton ke se yama “mermerşahi” (tülbent) i una tijera ke korta bien.
Una ijika serka de la famiya tiene la mision de kortar esta fashadura. En vezes, si ay ken no tiene dainda i dezeya tener kriyaturas, se da esta “onor” dizeremos, a eya. La ke korta la fashadura asigun su ojo, toma una kantidad de esta ropa, la avre, se mete bonbones aryentro, las madres, asigun sus buchetos, echan paras o liras de oro i se da la tijera. El resto se arazga kon la mano asta ke se desparte por entero. Este pedaso se da a una persona ke save kuzir (agora muy rala) para ke aga una kamizika larga. Esta kamizika la viste el bebe de ke nasyo de la tripa de la madre.
Todo esto tiene una sinyifikasyon: Los bonbones son para ke tenga una vida dulse. Las paras o oros son para ke tenga una vida kon abundansya i fertilidad, i la kamizika larga larga es para ke tenga una vida larga.
Ke ermozo uzo. Ma komo digo siempre estos uzos aparte ke tienen un lugar en las kulturas, son buenas okazyones de toparsen todos los keridos i versen. Porke kon esta presipitasyon de muestro tiempo mos vemos mas ralamente.
Siempre para okazyones orozas…
