El 3 Novembre diya de alhad la tadre a las oras 19 estuve en la eskola djudia ke avia nochada de filmos abituales. Muestro kerido i presyozo amigo Seyfi İşman, kada mez mos amostra unos filmos muy enteresantes ke no los puedemos ver en otros lugares. I yo ago todo mi posible para no fuyir esta nochada ermoza. Kale felisitarlo a Seyfi, en primero porke mos esta arekojyendo a todos mozos, sigundo porke no mos desha ambyertos i tresero porke mos da una sensya maraviyoza sovre los rejisores, produktores i djugadores. Lo ke me plaze mas muncho es, a la fin del filmo la diskusyon kon muy valorozas personas sovre el sujeto. Kada uno i uno da sus ideas i todos salimos orozos de pasar unas kuantas orikas ermozas. Te rengrasyo Seyfi i te felisito por tu famoza aktividad. El filmo de esta semana era el primer filmo de la sezon, un dokumanter byen reushido.
THE FINAL HOUR, “La ora final”.
El direktor Çağlar Mallı izo un dokumanter sovre el viaje de uno de los ultimos miembros de esta kultura, la familia de Deniz Bensusan i las raises del Ladino. En vyendo este famozo filmo todos los ekspektadores izimos un ermozo viaje empesando de la Espanya, Portugal, Sarajevo, Salonika i siguro un tyempo el Imperio Otomano i oy en diya la Turkiya. Deniz Bensusan izo entrevistas kon syertas personas ke la primera fue su nona ke avla el ladino muy byen. Deniz fue una buena djugadera en el filmo ma no kale sorprenderse por ke eya es inyeta de una vyeja djugadera de teatro, BETİ KOEN i yo tuve la onor de partajar shena kon eya.
“La ora final” no era un sujeto de olokosto. El filmo kijo dar a entender la ora de alkavo del Judeo-Espanyol. Afilu ke so una de las de alkavo ke avla esta lingua, munchas vezes penso ke veramente ya vino la ora de alkavo, les digo a mis amigas no mos envaneseremos en vano, mozos la matimos. Despues de ver este famozo filmo renonsi de pensar esta manera. Una manseva komo Deniz Bensusan esta penando para arebivir esta lingua de mas de 500 anyos, kijo dizir ke ya ay una chika luz. Deseo ke salgan munchas mansevas komo Deniz i ke perkuren para ke no se muera. La tadrada eskapo kon las diskusyones de SEYFİ İŞMAN i RENAN KOEN. Asperamos filmos muevos.
