La semana pasada era el aniversaryo de la muerte de Harry Houdini. Se rekonose en jeneral ke Harry Houdini (1874-1926), komo majisyano i artisto de eskapo, (de liberasyon de lugares serrados) establesyo el standard para todos los majisyanos futuros. Munchas personas tambyen son konsyente del fakto ke muryo egzaktamente el 31 de Octubre, diya de Halloween, diya de los echizeras, en el anyo 1926.
Lo ke muncha djente no save es ke el verdadero nombre de Houdini era realmente Eric Weisz i ke era ijo de un rabino ungaro ke yevo a su famiya a los Estados Unidos kuando Eric era un bebe. Eric troko su nombre en Harry, i tomo el nombre de shena de Houdini para onorar a su idolo, el majisyano fransez Robert Houdin.
El entereso i la pasyon de Houdini por la majiya empeso kuando era un adolesente. Kuando teniya 20 anyos, estava performando en toda las partes de Nueva York. Una de las formas frekuentes en ke Houdini gano fama fue eskapando de las kelepches i de los prezos de la polisiya. Enkorajando i azyendo pizmas a la polisiya en las sivdades de Amerika i Evropa a provar su abilidad, Harry se izo maestro en todo modo tipo de aktos de eskapo, desde djaketas atados asta kamaretas aryento de la agua, i en mizmo tyempo se izo maestro en todo modo de iluzyonizmo.
A parte de su kapachidad en la majiya, Houdini djugo en syertos filmos (filmos kon ekselentes aksyones ma djugado no tan bueno), dos de los filmos fueron produsidos en su propyo studio. Tambyen estava enteresado i afilu se puede dizir fasinado por la aviasyon i fue la primera persona a bolar sovre la Australia. I tambyen era un koleksyoner ambisyozo de livros i fue eskrivano de un livro ke entitulo, “Un majisyano entre los neshamot”, en el kuel relato sus investigasyones sovre este sujeto i kijo diskretidar el “spiritualizmo” (medyumes ke se konektan kon el mundo de los neshamot ).
En Octubre de 1926, en un viyaje en Montreal, Houdini permityo a un mansevo a chapteyar a su pecho para provar i despues alavarse sovre el fakto ke el podia suportar kualker golpe sovre su puerpo, ensima de la sentura. Malorozamente, lo ke Houdini no saviya era ke su apandis estava infektado. Despues de los golpes, su apandis se patladeyo i Houdini muryo unos kuantos dias despues achakes de peritonitis.
Esta shena final de Harry Houdini tuvo lugar el 24 de Octubre de 1926.
