Isak Eskinazi
Un treser produkto de ekonomiya fue la Seda. La istorya mos dize ke la seda empeso a egzistir en China aze mas de 4.000 anyos i los Chinos tuvieron esta monopoliya durante munchos miles de anyos. Si algun etranjero keria yevarse el sekreto de la seda afuera de China, pishin lo matavan.
Los Chinos eksportavan la Seda por un kamino ke salia de China, pasando por los payizes de Asya Sentral, seya por el norte del mar Preto, seya por Konstantinopla i yegava asta Evropa. Este kamino se konosyo komo “La Ruta de la Seda”.
La Seda siempre fue un artikulo muy karo. Solo los Reyes, los Emperadores tenian el derecho de ser patron de kualkiera koza de seda.
En China la Seda tenia la misma valor ke el oro. Los Chinos supieron tan bien azer papel de Seda, ke solo el Rey puediya empleyar este papel de Seda, para eskrivir.
Una koza interesante ke fue deskuvierto en una tumba de uno de los Paros de Ejipto, aze unos 3.000 anyos, en el “Vaye de los Reyes” fue una ropa de Seda importada de China.
Savemos ke en la antikuedad, la Seda era una koza ke se puediya trokar kontra el oro, el marfil i mizmo kontra kavayos.
En el Imperio Romano, la seda fue una grande lokura ke se vendiya por 300 dinares, lo ke era el sueldo de un komandante, por todo el anyo.
Se dize ke el Imperio Romano se ambezo el sekreto de la seda en el siglo 6 en la epoka del emperador Justiniano ke fraguo la famoza Santa Sophia (Ayasofya), Santa Irene (Aya Irini), la Sisterna Bazilika Undida (Yerebatan Sarnıcı) i ke embiyo 2 papazes a China para ke se ambezen el sekreto de la seda. Los Papazes tornaron de China eskondiendo kapuyos (koza) ariento de los bastones, para no apanyarsen por los guardias, ke azian un kontrol muy serio.
Savemos tanbien ke los Japonezes supieron este sekreto de las esklavas chinezas ke se las yevaron a Japonya en el siglo 4. i en India en el siglo 5. Ama en el Imperio Romano fabrikaron la seda no solo en Bursa, ke fue el sentro de las moras, tomaron la teknika de los Sasanides de Persya, ke tanbien se avian ambezado kaji todo de la India, i fabrikaron la seda en el este.
La seda, komo se save, se obtiene de la bava del guzano de seda, ke en kontakto kon el ayre se kondensa i se troka en fibra. En la primavera el guevo del guzano se enrodeya en kapuyo ke va dar la maripoza. Para utilizar las fibras, antes ke naska la maripoza, se mete el kapuyo en agua kayente i es asi ke se fabrika la seda, en metiendo munchas fibras a los chikrikes. Para obtener un kilo de seda se nesesita 10 kilos de kapuyo i para tener 1 kilo de kapuyo se nesesita a lo menos 500 o 600 kapuyos.
