Los aktores reputados: GONCA VUSLATERİ i FIRAT TANIŞ. El kuple en duo, en la shena estavan fastuozos i jenial! No solo realizaron la boda djudia debasho de la hupa, enkarnaron i enterpretaron rolos de sus parientes tambien...
La senarista ingleza SAMANTHA ELLIS mos regalo de sorprezas una komediya agradavle.
Steve i Kate se enkontran en un parti kostumé. Dos karakteres diferentes.
Apresyi el djugo de Steve, ijo de una madre ke se engrandesio i salvo del kampo de konsentrasion i Kate, ke le gusta los ombres malos.
Asistimos a una boda Judiya-Judio kon la hupa, la novya kon su fostan de novya i la tradision del novyo ke piza una kupa i la rompe. La tradision para akodrarmos la destruksion del templo de Yerushalayim. Para akodrarmos las sufriensas del puevlo Judio, mizmo en la alegria personal.
La piesa alerte i yena de sorprezas, mos konto el rolo de un ombre feministo i de una mujer ke peryo la suerte de ser una mujer feminista.
Gonca Vuslateri i Fırat Tanış mos regalaron kon sus performansas meritantes...
No me va olvidar sus deslumbramiento de saver trokarsen de vistimientas estetikamente i no dar mareo. Fue un desprendimiento.
Felisitamos el djugo vertijinozo.
Estavamos kon palmas i bravos, todos i todas en pies, para rengrasiar el Happy End...
El filmo PARASITE
Obtuvo la Palma de Oro
(72. FESTIVAL DE CANNES)
El Mijor Filmo
(66. SYDNEY FILM FESTIVAL)
Los amantes del 7en arte, tuvimos la posibilita de pueder apresiar el filmo koreano: PARASITE, por la primera vez. La famiya KIM, proves, portanto kapachis, supieron impozarsen a la famiya rika PARK para ganar sus vidas. Intelijentes, entraron todos los kuatro miembros i parvinieron a azersen akseptar: el uno komo profesor de inglez, el otro komo profesor de arte, la madre komo la mosa, el padre komo shofor, se infiltraron a la kaza ultra moderna. Ma malgrado sus esforsos, no parvinieron a guadrar fina la fin la realita de siertas kozas. Vino la ora de no pueder maskar.
El rejisor BONG JOON-HO ke ekspoza kon grande abilidad las feridas de diferensia de klasa, dize para el filmo: “Una komediya sin un palyacho, un dram sin una persona negra...”
