Despues de Granada, mos fuimos a “Cordoba” kon el otobus ke mos estava asperando.
“Cordoba”, una sivdad de filozofiya en Andalusia en Espanya. Cordoba bivyo la perioda de oro en los siglos 10 i 11. Esta sivdad es una djoya ke se konstruizo en medyo de una vaye al bodre del rio de “Guadelquivir” ke es mas largo de 600 kilometros. Se dize ke es la sivdad de los filozofos.
Aki entre los anyos 700-900 aviya mas de 600 bibliotekas, i mas de un milyon de livros de eskritura a mano. Mas despues, kemaron todos los livros kon la desizyon de Andalusia, las valores fueron destruidas. Malorozamente lo ke pudo rekuperarse fue solamente 30 volumes de livros.
“Cordoba” es la sivdad la mas spesyal de Andalusia. Aki la kultura islamika, los djudyos i las trasas de Roma, estan formando un mozaiko kultural. Oy se esta uzando komo katedral la Meskita de Cordoba i kontyene 1013 kolumnas. Es un monumento istoriko el mas empresyonante ke se topa en el mundo entero.
Este edifisyo maraviyozo, tomo su lugar entre los Piramides, la Grande Muraya de la China i Ayasofya komo una struktura inolvidavle i emportante de su perioda.
Konvertida de una meskita a una iglesya, kuando vijitimos i kaminimos aryento sintimos la rikeza de un lavoro ke es una senteza de relijyon i kreensya.
La maale de los djudyos se topa en el sentro de la sivdad vyeja, toda la kaleja golyendo al miskle de flores, las plasas kon las pisinas, los arvoles de portokales kon los kortijos finos avyertos para ke los turistos vijiten. Esta maale esta byen konservada. Entre las golores de las flores, la sinagoga del 13en siglo, el filozofo famozo ke nasyo en 1538 en Cordoba, la statua de “Maimonides”, el museo de los djudyos sefaradis, la “Casa de Sefarad” fue muy enteresante.
“Alcazar”, de los reyes kristyanos se konstruizo en el ochen siglo komo un palasyo. Es el simbolo emportante de Cordoba ke se uzo por los dirijentes del pais durante 160 anyos. Oy es un museo kon las fuentes, las vedruras, i las guertas kon los kortijos son una erensya de los musulmanos. Malorozamente la sinagoga estava serada. No pudimos vijitarla. La kaleja de las flores es la kaleja la mas popular de Cordoba.
A kontinuar….
