El projekto de resiklaje de retornar atras los sierkos, los chopes a la natura ay muncho tyempo ke empeso. Una idea muy buena. Ma lo ke veyo es ke no se esta realizando. En todo modo de lugares i mas muncho en las eskolas ay botas para apartamyento de los chopes. El governo esta anonsando kada diya esto. Ma de muevo va repetar mi palavra. Este projekto esta un poko en el aver. El puevlo no esta aziendo atansiyon para separar. Al lugar de los papeles estan echando otros chopes, por egzemplo, zarzavates o frutas. I mas i mas en las botas de los bokales estamos viendo otros chopes diferentes. De muevo va repetar ke esto es ke tyene dar i aver kon la edukasyon. I de otra parte ay de pensar ke este projekto esta trayendo un koste demaziado para el retorno. Por esto yo digo para penar esto todo, empesar de la raiz es mas konvenivle. Todo modo de embalaje apokar, amenguar no es mas djusto? Vozos ke dizish? https://zerowastehome.com/ https://www.youtube.com/watch?v=y583QTbetsQ;
En los marketes todo modo de koza se esta vendyendo kon ambalajes. Ay unos projektos en el mundo ke tu te vas a yevar el bokal o el katramis para ke te lo inchan. Ya se ke no es muy kolay. A poko, a poko. Ma en vezes esto viendo afilu mas muncho, en los bazares ke venden produktos natural. https://www.sifiratik.gov.tr/;
https://www.sifiratik.gov.tr/kutuphane/etkinlikler/sifir-atik-zirvesi-21-24-kasim; https://www.sifiratik.gov.tr/sifir-atik-tv; https://sifiratik.co/2018/09/14/bilim-adamlari-kuresel-isinmayi-engellemek-icin-25-yil-kaldi-diyor/ vos konsejo. Eskuza me, ke vo repetar. El avenir, el futuro es de los bebes. No tenemos el derecho de arrovarles esto de eyos. Atansiyon sovre la konsomasyon demaziada.
I en el kavo de mis palavras vos kero travar la atansiyon a un otra konsomasyon. Tyempo, minutos. Diya en diya los puerpos estan lavorando mas poko. Ay munchas fasilidades de azer echos. Ma a la fin del diya no tenemos tyempo para nada i estamos kansados. No ay dinguna persona ke el telefono no es komo prolungasyon de la mano. Kuando estash suvyendo al metro azé atansiyon al entorno. Syen por syen estan kon el telefono mirando a los mesajes. Whatsapp, mail, o djugar bavajadas. El mas emportante, las kavesas estan abasho. El puerpo kambur. Me espanto ke las djenerasyones muevas van a naser kon las kavesas abasho. Esto es el developamiento normal de la evolusyon.
