Un alhad la tadre i un ermoso dokumental. El alhad pasado kon la envitasyon de muestro kerido amigo Seyfi İşman, estuvimos en la eskola djudia para ver el filmo ke mos aparejo. Seyfi es un investigador sovre filmos enteresantes, se okupa, se informa, mete subtitulos i mo los trata prontos.
Esta semana mos amostro un dokumental preparado de la parte de la direktora İlana Navaro ke anonsya la istoria de Josephine Baker. “An Awakening Story”.
İLANA NAVARO nasyo en el anyo 1970 en Estambol. Despues en 1992 eskapo la sosyolojia en USA Bard College, lavoro para varios medios de komunikasyon en New York. Despues en 1995, lavoro komo periodista de televisyon en Estambol. Preparo dokumentales para el kanal de Arte franses i Aleman. En IFSAK Estambol i en Nuremberg gano premios en los festivales de kurtometraje. Aktualmente lavora komo periodista independiente.
Josephine Baker, una ija prove i preta, nasio en Missouri. La chikes lo paso aziendo mosedad a los blankos i fue maltrada de la parte de eyos. Su dezeo era vinir kontra el fashizmo i dar un mesaje al mundo. Se fue a la Fransya, kon sus bayles diferentes i erotikos, se izo una famosa artista i dezeada de todos los lokales i teatros. Antes de unirse a la Resistensia franseza adopto a dodje kriaturas de todas las relijyones katolikes, protestanes, muzlumanes, djudyos i mizmo budistos. Formo la famiya de sus esfuenyos, i dyo el mesaje ke keriya al mundo. Josephine Baker fue la primera superestreya preta en la Evropa. Ma malorozamente en la Amerika no tuvo tanto sukseso, no le dyeron echo, no le dyeron kamareta en los oteles, la echaron de los restoranes i fue maltratada solo porke era preta. Impotente torno a la Fransya.
El dokumental de Josephine Baker fue echo de archivos raros i unikos.
La tadrada eskapo komo syempre kon la diskusyon de la famoza psikologa Leyla Navaro reprezentante de su kerida ija ke estava afuera la sivdad.
