Eliz Gatenyo
Dos sovrebivientes de Auschwitz se toparon despues de 72 anyos.
David Wisnia i Zippi Spitzer estavan todos los dos en el famozo kampo de la muerte Auschwitz. David teniya 17 i Zippi teniya 25 anyos. Grasias a sus talentos, estos dos prizonarios no fueron matados. Zippi era desinatora de grafikos i David teniya muy ermoza boz. A Zippi le dieron una mision de mesklar kolores para azer desenes en las uniformas de las mujeres. A David le dieron dos misiones. La una era de kantar en las nochadas a los ofisyeres de SS i la otra era de arekojer entre el diya los puerpos de los prizonarios ke se suisidavan, en apegandosen a los teles del entorno del kampo yenos de elektrisidad. Los dos amantes bushkavan okazyones para toparsen en lugares sekretos. Zippi aviya ambezado a David una kantika ungareza ke la kantavan kuando estavan endjuntos.
Kuando se oyo ke la armada sovietika se estava aserkando de la armada alemana, munchos prizonarios fueron transferados a otros kampos o fueron matados. Antes de espartirsen se aprometyeron de toparsen en Varshova. Wisnia se fuyo de la marcha de la muerte en matando a un ofisye de SS i se eskondyo en un garaj. Aya lo toparon los soldados de la fuersa aeriana amerikana. Le dieron vistimientas, uniforma i armas. Lo izieron treslador. Aya desido Wisnia de no irse a Varshova i azerse amerikano.
Zippi salyo de Auschwitz kon el grupo dalkavo. Mirakulozamente sovrebivio en mesklandose a un grupo de moradores alemanes ke se estavan fuyendo de la armada sovietika. De aya se fue a un kampo de judios.
Kuando eskapo la gerra todos los dos se dispersaron en diferentes lugares del mundo. David emigro a USA. Zippi i su marido Erwin pasaron la majorita de sus vidas a lavorar por la umanita. Se fueron a Peru, Bolivia, Endonesia, Australia i se enstalaron en New York.
David tanbien se kazo i se enstalo en Pennsylvania. De un konosido komun se ambezo ke Zippi biviya en New York. Aprovo munchas vezes de organizar un randevu ma eya no akseptava. Zippi diziya ke no era djusto de toparsen por ke era eya kazada.
En 2016 David aprovo demuevo a kontaktar Zippi. Esta ves aksepto Zippi. David tomo a sus dos inyetos i se fueron a la kaza de New York de Zippi. La povereta sufriyiya de munchas hazinuras. Malgrado ke pasaron 72 anyos, lo konosyo a David. “Sus ojos se engrandesyeron, i fue komo ke si retorno a la vida” disho el inyeto de David.
David demando a Zippi si eya era la razon ke el sovrebivio en Auschwitz. Eya lo miro kon una mirada dulse i le disho: “5 vezes te salvi de las ekspedisyones a la muerte”. Despues le disho ke lo aspero muncho en Varsova komo se aviyan aprometido. Antes de espartirsen, Zippi le demando ke le kante una kantika, kon su boz ermoza. David le tomo la mano i le kanto la kantika ungareza ke Zippi le aviya ambezado en el kampo.
David bive en el norte de New York, Zippi muryo a 100 anyos.
Ken save kuantos otros amores se bivieron en estos kampos desgrasiados.
