Kenan Cruz Çilli
En el norte de Portugal se topa una sivdad chika ke se yama Belmonte. En muestros diyas Belmonte es un lokal famoso i turistiko en el norte del payis por dos razones. Primero, Belmonte es el lugar de nasimiyento de Pedro Alvares Cabral, un eksplorador portugez famoso ke fue uno de los primeros evropeos ke navigo al Brazil.
I la segunda razon es la istorya i erensiya djudia rika de la sivdad. Antes de la ekspulsyon de los djudios de la peninsula iberika, se topava una komunidad muy grande i importante de djudios en Belmonte. Oy dainda ay relikos istorikos en Belmonte ke aparteniyan al periyodo de antes de la ekspulsyon.
Despues del edikto de Alhambra, los djudios de Portugal i Espanya teniyan dos opsiyones: o de konvertirsen al katolisizmo o de ser ekspulsados. La istoriya djudia de Belmonte es muy espesiyal por kavzo del fenomeno de marranos - djudios ke pretendieron konvertirsen al katolisizmo ma ke kontinuaron a pratikar el djudaizmo en sekreto. Antiguamente se topavan komunidades de Marranos en munchas partes de Portugal i Espanya ma en Belmonte, este fenomeno kontinuo asta los anyos 1970s kuando algunas famiyas revelaron ke eran de erensiya djudia i ke sus famiyas syempre kontinuaron sus tradisyones djudias.
Despues del retorno publiko al djudaizmo, los djudios de Belmonte avrieron un kal muevo en la sivdad en el anyo 1996. Fue la primera vez en munchos i munchos siglos ke un kal fue konstruido por una komunidad kon raizes tan istorikas en Portugal. Desde este anyo munchos kales fueron konstruidos o restorados, i en munchos kazales i sivdades de Portugal ay mas i mas intereso en la istorya i erensya de los sefaradis. Oy, munchos turistos en el mundo entero kon raizes en Portugal vyenen vijitar estas rejiones para deskuvrir mijor sus istoriya familial.
Algunos anyos antes yo fui a Belmonte kon mi famiya komo turisto. Oy se topa una komunidad djudia kon una populasyon serka de 300 personas kon un kal ermozo, un simiteriyo, i tambiyen un muzeo djudio. En el muzeo los visitantes pueden ambezar sovre la istorya unika de los djudios de Belmonte ke kontinuaron sus tradisyones i protejaron sus relijyon en sekreto por 500 anyos malgrado todas las difikultades ke bivyeron durante la istoriya. Kuando avli kon la sinyora ke lavorava en el muzeo eya me disho ke la mayoridad de turistos djudios ke vyenen a Belmonte son de Brazil o Israel. Estos turistos vyenen en bushkidad de sus raizes i sus erensiya. Komo una grande parte de djudios en Turkiya tambyen tyenen raizes en Portugal me interesava saver si alguno de las kehilas turkas fue asta Belmonte i komo fue esta eksperiyensiya.
