Kerido Kenan Cruz Çilli,
Meldi tu artikolo en el Şalom kon grande entereso. Siendo ke so un istoriador sovre los Djudios de Turkiya, tengo konosensia sovre las sinagogas de nuestro pais i livros a este sujeto, inkluida la Sinagoga sitada… i de mas siertos rekordos personal.
En los ultimos anyos del siglo XIX, una grande parte de los Djudios ke alkansaron de fuir los pogromes en Polonya, Rumaniya i Rusiya toparon refujio i salvasion en Turkiya.
Munchos entre eyos ke se topavan en la provedad i la mizeria se establesyeron en los barrios de Yüksekkaldırım i Kemeraltı en el distrito de Galata.
La provedad estava en un nivel tan terrible ke munchas mujeres kayeron en bordelos.
En repuesta a la solisitud del Gran Rabino para un permiso para konstruir una sinagoga i una eskola para los Djudios Ashkenazi de Galata, en su propio terreno en la kaye Zürefa, le fue akordada la otorizasyon imperiala de data del 20 de Ramadán 1313 [5 de marzo de 1896] de fraguar un edifisyo de dodje metros de altura.
La parte inferior del edifisyo fue okupada komo Moshav Zekinim (Asilo para los Viejos) ke se establisyo kon las kontribusyones de la Komunidad Ashkenazi de nuestra sivdad i de las mujeres Djudias del barrio ke kerian asegurar sus futuro.
La parte superior fue la Sinagoga yamada Or Hadash, ke sinyifika Nueva Luz, utilizada fin 1963 por los miembros de la Komunidad Ashkenazi. El tejado del edifisyo fue reparado en 1956 i la sinagoga fue asinyo al kulto Sefardí Georgiano (Gürcü) en kontro de una donasyon anual. Mi eshuergo (z”l) era uno de estos Georgianos i tuve la okazyon de partisipar a siertas orasyones de Pesah o Kipur.
Despues ke los Georgianos se fueron, la sinagoga fue kompletamente abandonada i el edifisio fue vendido en 1987.
