En uno de mis viyajes a Israel, vijiti el Muzeo “Beit Hatfutsot” ke se topa en la universita de Tel Aviv. Aya aviya maketes de las sinagogas del mundo. Kada sinagoga teniya la arkitektura del payis ande se topava. Estava verdadmente muy enteresante. Oy meldi otra koza enteresante sovre unas sinagogas del mundo.
Meldi ke ay 5 sinagogas en el mundo donde en basho son kuvridas de arena. Ya tenemos visto marmol, tavla, parke, chini o en vezes tapet. Ma no aviya ni visto ni oyido safra o arena.
Las kuatro de estas sinagogas, ke en basho es de safra, se topan en las Karaibes i la una se topa en Amsterdam (Hollanda).
Dizeremos ke en las Karaibes es normal, porke todo es safra, lo kurioso es ke i en Amsterdam se topa la sinagoga Portugeza Esnoga ke es yeno de safra en basho.
Ay unas kuantas eksplikasyones por esto.
Dizen ke la una es para akodrarmos del viyaje o del egzilo de los judios en los deziertos. Kon esto, pensan ke komo los judios de las Karaibes no tornaron a Yerushalayim, se kontan dainda en el egzilo i tienen la esperansa ke algun diya van a pasar el dezierto para ayegar a sus patrias.
La sigunda eksplikasyon, dizen ke viene del tiempo de la engizisyon espanyola. En el siglo 15, los judios en Espanya biviyan sus leyes en sekreto. I kuando se keriyan reunirsen para orasyonar en un lugar a la eskondidas, inchiyan de safra en basho para ke no se les oyga el bruido de las patadas. Los inyetos de estos judios ke eran eskondidos, despues de anyos imigraron a las Karaibes i kijeron kontinuar esta tradisyon komo rekuerdo.
Por tanto la sinkena sinagoga ke se topa en Amsterdam, dizen ke meten en basho safra para absorbar la suzyedad, el polvo i la umidita de los kalsados de los asistentes i siguro para amortisar el bruido de las pizadas.
Los karibeanos es posivle ke ya se olvidariyan la kavza reel de la safra, ma dizen ke eyos kontinuan a mentener la tradisyon de sus padres.
Los nombres de las sinagogas karibeanas son: La sinagoga Shaare Shalom de Kingston en Jamaika, La sinagoga Mikve Israel-Emanuel (Snoa) de Willemstad en Kurasao, La sinagoga Zedek ve Shalom de Paramaribo en Suriname, i la sinagoga Beracha Veshalom Vegemilut Hasidim de Santo Tomas en las Islas Virgenes de los Estados Unidos.
El nombre de la sinagoga de Amsterdam en Hollanda es: La sinagoga Portugeza Esnoga.
La sinagoga de la Isla de Kurasao es konsiderada komo la sola sinagoga del oksidente, ke reusho a estar aktiva sin estar nunka interrompida. La sinagoga de las Islas Virgenes esta considerada komo la segunda sinagoga mas antigua de todo el territorio de los Estados Unidos.
Ke bueno es de ver ke estas tradisyones se pasan de jenerasyon a jenerasyon i ansina kontinua muestra kultura sin ser olvidada.
