Mi esfuegro i mi esfuegra eran nasidos en Salonik. Kuando uvo el fuego grande de Salonik, eyos eran chikos. Komo kedaron sin nada, ni kaza, ni vistimienta, ni paras, komo todos los otros selaniklis, se mudaron a las kazas de sus serkas paryentes. Ken se fue a Paris, ken se fue a la Italia i ken se fue al Ejipto. En abandonando sus moradas i sus sivdades teniyan solo sus almas.
Los padres de mi esfuegro vinieron a Estambol al lado de un ermano. Los padres de mi esfuegra vinieron a Bakırköy ke akel tiempo se yamava Makriköy.
Kon tiempo se engrandesyeron siguro, mi esfuegra meldo en un lise franses de söres ke aviya en Makriköy, mi esfuegro meldo en otra eskola franseza i despues los dos, por koinsidensia se empyegaron en la “Banca Commerciale Italiana”. Aya es ke se konosyeron, se ennamoraron i se kazaron.
En esta banka teniyan munchos kolegos. Kada uno teniya su partikularidad. Ma uno de entre eyos, era un Italyano Sinyor Piveta. Este Sinyor Piveta era una persona muy enstruido i muy kebar. Teniya un solo defo ke era muy distraido. El no era kazado. Todos lo keriyan muncho bien i komo biviya solo, lo envitavan a komer.
Un diya yene uno de los amigos lo envito, ma asta la tadre ke salieron de la banka, se olvido. Ken era? Tomo un buketo de rozas i se fue ande uno de los amigos. Sono la puerta, el amigo avriyo la puerta, Piveta le demando: Tu me envitates esta noche a komer? El amigo disho: No! Ok. Sin entrar, se fue ande el otro amigo. I aya afito la mizma koza asta ke topo el amigo ke lo envito.
Otro diya saliendo de la banka, paso por Balıkpazar i merko kozas para gizar. Merko i guevos. Antes de suvirse al tramvay, penso ke entre tanta jente, se pueden rompersen los guevos. Ke azer? Akel tiempo en Pera todos los ombres kaminavan kon chapeyos de fötr. Los metyo aryentro su chapeyo. Ya paso muy bueno, ya abasho sin ke se rompan los guevos. En el kamino vido una damma ke era amiga de famiya. Eh, la kijo saludar, noblesa dize ke un mösyö saluda en kitando su chapeyo. Piveta ya se olvido de los guevos, kito el chapeyo i pafff todos los guevos kayeron en basho.
Un diya de Alhad, Piveta kijo envitar sus amigos a komer a su kaza. Les deviya muncho. Se alevanto prestiko aparejo la meza, aparejo la salata, izo un ermozo arroz i aparejo una gayina ke al momento dalkavo la iva meter al orno. Todo estava kaminando muy bien. A las sinko metyo la gayina al orno. Komo ya vos imajinash, se olvido. Ya estava serka de vinir los musafires, ensupito sintyo una golor de kemado. Guay guay guay ke ya se kemo la gayina. Pishin tomo un handrajo i kito la gayina del orno. En kitando la gayina, ampeso a enflamarse el handrajo. Se kijo eskabuyir del handrajo, del panik i espanto, avriyo la ventana ke mirava a la guerta i al lugar de echar el handrajo echo la gayina.
Malorozamente akeya noche los musafires komieron solo salata kon arroz.
