El 5 oktobre a la ora 7.30 las luzes se avren en la eskola djudia en el salon Alber Levi. Los ombres i munchas mansevas vinyeron de sus echos kansados, las mujeres salyeron del mupak, aparejaron sus komidas i sus mezas a los maridos i vinyeron koryendo koryendo kon un mesaje de whatsup ke les echo “Forti abla”.
Tanto los kero byen esto sigura i ke eyos me keren porke kon un mesaje vyenen pishin. Tanto tyenen konfiensa ke no me demandan kualo vamos a djugar, ke rolo tengo, rolo chiko, rolo grande no les difera; el buto es sufiziente de estar endjuntos i siguro azer ovra.
Ansi empeso el kamino largo de los REKUERDOS.
Kaji un mez de provas de meldar porke guay di mi estan djugando un djugo sin saver la lingua muy byen. Karen kon Ceyda Pirali ke es la muzisyena eskojeron las kantikas; Rina Muraben peno i lazdro kon los bayles, Ferit Koen el direktor kon pasensya i kon muncha dulsor mos mete en shena, yo arekojgo fostanes de las kermeses i empeso a merkar tüles, dantelas, kordelas i kuzgo los kostumes para no gastar paras porke el budjeto no es muy fuerte.
Entremyentes kada lunes i djugeves (diyas de sefer) mos arekojimos para azer provas i provas i provas… en el salon DEVORAH porke el oditoryum es angajado solo para 2 provas jeneral. Un grande remersyo a la eskola ke mos da los salones para lavorar. Ya vos imajinash estos bayles en un salon chiko ma atorgare ke en las provas mos amuzamos i riyimos muncho. A los kavos ya mos vyene enfasyos de repetar syen vezes la mezma palavra ma no ay remedyo; ken le plaze la roza somete la espina.
Aki tengo de remersiar a munchas personas ma no tengo lugar para todos. En primero grasias a SİLVYO OVADYA por su apoyo; grasyas a mis keridos AMIGOS PARA SYEMPRE i a todos los ke vinyeron a vermos.
