Meldaremos este veramente ermozo teksto de Boucar Diouf de 54 anyos; biologo, osheanografo, eskritor, profesor, komedyen nasido en Senegal, i de sujestyon Kanadiano.
A penas el diya empesa, ya se aze las 6 de la tadre.
A penas empesa lunes, vemos ke ya se izo vyernes.
I el mez ya se eskapa, i el anyo ansi ya pasa, i ansi pasan 40, 50 o 60 anyos de muestras vidas. I mos apersivimos ke pedrimos a muestros padres, amigos, i mos damos kuento ke es bastante tadre para tornar al tyempo de antes.
Alora, malgrado todo miraremos de aprovechar al maksimo del tyempo ke mos kedo. No desharemos de bushkar aktividades ke mos plaze. Meteremos un poko de kolor en muestro grizo. Sonrieremos a la chikas kozikas de la vida ke meten kalor en muestros korasones. I devemos de kontinuar a aprovecharmos kon kalmo del tyempo ke mos keda. Miraremos de eliminar el “despues”.
Lo ago “despues”
Lo digo “despues”
Lo pensare “despues”
Deshamos todo para mas tadre komo si “despues” fuera muestro. Porke lo ke no entendemos es ke “despues” el kafe se yela, “despues” las prioridades trokan, “despues” el enkanto se fuye, “despues” la salud pasa, “despues” los ijos se engrandesen, “despues” los padres se envyejesen, “despues” las promesas se olvidan, “despues” el dia se troka a la noche, “despues” la vida se eskapa, i “despues” ya es bastante tadre.
Entonses, no desharemos nada para mas tadre. Porke en asperando el “mas tadre”, puedemos pyedrer los mijores momentos, las mijores eksperiensyas, los mijores amigos, la mijor famiya.
Keridos Amigos, el dia es oy. El momento es agora. No lo deshesh para “despues”
Al vermos.
