Alhad pasado el 16 Febrero 2020 se fiesto e Dia Internasyonal del Judeo-Espanyol/Ladino, Estambol. Estava un dia muy muy agreavle. Un dia yeno de judeo-espanyol.
Komo kada anyo, i este anyo se fyesto en la sala de teatro de la eskola Judiya en Ulus. Antes de todo kero rengrasyar a los organizatores por este festival. Yo lo kero yamar festival porke estava una fiesta.
El festival ampeso kon los deskorsos de avyertura ke izieron Karen Sarhon i Silvyo Ovadya. Despues teniyamos una musafira de Fransya, la profesora Marie Christine Varol, ke mos avlo de las konsejas ke le kontava su esfuegra ke las kito del dip del bavul. Las tres dammas Suzet Herman, Şeli Gaon i Anna Eskenazi izieron una pyesa chika ke mos amostro, komo djugavan antes i komo djugan agora los ijikos de eskola. Estava muy enteresante de ver de ande a ande vino el modo de bivir. La famosa profesora Lili Değerli mos konto komo devemos de bivir para kedar siempre mansevos. Despues de Lili Değerli tomi yo la palavra i konti a la odiensa una istoryika komika ke le afito a mi prima Fanika, munchos anyos antes. Kuando eskapi la istoryika mos fuimos a komer komida de midi. Vos kontare lo ke komimos. Bulemas, avikas kon espinaka, arroz i halva de bimbriyo.
Kuando mos asentimos a muestros lugares ampeso el konserto del koro de las Estreyikas, en la direksyon del sinyor Izzet Bana. Lo felisito por su lavoro i por su pasensya de djignisheyar kon tanta kriyatura. Mos daron un konserto muy muy reushido. Siguro rengrasyamos i a la orkestra ke koopero enjuntos. Este anyo kitaron un CD muy alavado de las kantikas del koro.
Kuando eskapo el koro de los ijikos el Sinyor Izzet Bana kijo rengrasyar a todos ke metyeron mano i apoyaron este koro, en sembrando arvoles al nombre de kada persona en el boske de Ataturk en Israel.
Ya era la sira de bever un kafiko o un chay. Mos ofresieron Borekitas de Berenjena, Borekitas de Patata, Biskochikos, Köftes de Prasa i Mandalinas. Todo fresko muy savrozo una maraviya.
I vino la sira del teatro. Forti Barokas komo kada vez, eskrivio una piyesa de teatro. La pyesa mos izo akodrar los tiempos de antes. No vos va kontar la piyesa entera por ke se va djugar mas otras dos vezes. No kero bozdeyar la surpriza ermoza.
I kuando ya salimos de la sala para irmos a muestras kazas, todos estavamos muy kontentes. Kon una sonriza en la kara. Pasimos un diya yeno yeno de muestra kultura en avlando en kantando i en komiendo. I mas i mas era ke aviyamos renkontrado muncha djente ke no aviyamos visto desde muncho tiempo.
En esperando ke este ermozo diya “tenga ermanos”, vos va dizir lo ke era la “reyna del diya”. Sigun mi la reyna del diya era LA HALVA DE BIMBRIYO.
