Primo marso, diya de alhad la tadre, a la ora 19.00, el salon de teatro de la eskola djudia estava yeno de djente ke vinyeron a ver el filmo “Sefarad”.
Yo aspero a ojos a ojos estos filmos porke kada uno i uno son byen eskojidos de la parte de muestro amigo SEYFİ İŞMAN. Veramente Seyfi es un investigador alavado enriva de estos filmos ke no los puedemos ver en otras salas de sine.
Syempre el filmo eskapa i empesan las diskusyones kon syertas personas muy presyozas. Esta ves la prezentasyon empeso en la entrada antes de anpesar el filmo. KAREL VALANSİ mos enformo sovre el sujeto del filmo ke konsernava los djudyos de Portugal.
El filmo mos yevo al anyo 1496 i vimos ke muncho antes de esta data en el 5en siglo mezmo ya biviyan djudyos en estas tyerras. Malorozamente kuando empeso la ostilidad sovre los djudyos munchos fueron konvertidos para no murirsen. En el filmo vimos ke en syertos kazales anyos i panyos bivyeron djudyos kristyanos ke los yaman maranos. Un kolonel izo todo su posivle para fraguar una keila i tornarlos al djudaizmo. Por siguro ke aviya opozisyon, lo kondanaron, le echaron difamasyon (aftira) i lo kitaron del servisyo militar. 50 anyos despues su inyeta Isabel bushko su derecho i parvino a tomar el rango atras.
Despues de esta odiensya salyo la ley de dar a todos los djudyos sefaradis la sujestyon Portugeza. No se si es para pardonarsen u byen por otra razon ma lo se muy byen ke mis inyetos son Portugezes!
