Un djugo teatral perfekto...
Los aktores reputados GONCA VUSLATERİ i FIRAT TANIŞ, el duo, en la shena estavan fastuozos i jenial. No solo realizaron la boda Judiya debasho de la hupa, enkarnaron, enterpretaron rolos de sus parientes tambien... La senarista ingleza SAMANTHA ELLIS mos regalo sorprezas - una komediya agradavle.
Steve i Kate se enkontran en un parti kostumé. Dos karakteres diferentes. Apresyi el djugo de Steve, ijo de una madre ke se engrandesio i salvo del kampo de konsentrasion, i Kate, ke le gusta los ombres malos.
Asistimos a una boda Judiya kon la hupa, la novya kon su fostan de novya i la tradision del novyo ke piza una kupa i la rompe - la tradision para akodrarmos la destruksion del templo de Yerushalayim, para akodrarmos las sufriensas del puevlo Judio, mizmo en la alegria personal.
El djugo, alerte i yeno de sorprezas mos konta el rolo de un ombre feministo i de una mujer ke peryo la suerte de ser una mujer feminista... GONCA VUSLATERİ i FIRAT TANIŞ mos regalaron kon sus performansas meritantes... No me va olvidar el deslumbramiento de verlos trokarsen de vistimientas estetikamente i no dar mareos. Felisitamos el djugo vertijinozo.
Estavamos kon palmas i bravos todos en pies, para rengrasiar el Happy End...
I “PARASITE” obtuvo LA PALMA DE ORO en el 72. Festival de Cannes
EL MIJOR FILMO en el 66. Sydney Film Festival i EL OSCAR en 2020
Los amantes del 7en arte, tuvimos la posibilita de pueder apresiar el filmo koreano “Parasite” por la primera vez.
La famiya KIM, proves, portanto kapachis, supieron impozarsen a la famiya rika PARK para ganar sus vidas. Intelijentes, entraron todos los kuatros miembros i envizajaron a azersen akseptar: El uno komo profesor de inglez, el otro komo profesor de arte, la madre komo mosa i el padre komo shofor, se infiltraron a la kaza ultra moderna. Ma malgrado sus esforsos, no parvinieron a guadrar fina la fin el enganyo. Vino la ora de no pueder maskar la realita de siertas kozas.
El direktor BONG JOON-HO ke mostra las yagas de diferensia de klasa kon grande abilidad, dize para el filmo: “Una komediya sin palyacho, un drama sin una negra persona”.
