En el anyo 2010, se konstruyo un memorial en Atena para onrar las viktimas del Olokosto de Gresya. Este monumento fue dezinyado por la famoza artista grega amerikana, DeAnna Maganias. Atena fue la dalkavo kapital de la Union Evropea ke konstruyo un memorial para komemorar los ke muryeron en las manos de las fuersas nazistas.
“Realizar este monumento fue difisil, ma a la fin ya se realizo i el mesaje es simple: ‘No mo lo olvidimos i no mo lo vamos a olvidar’, disho Benjamin Albalas, el prezidente de la komunidad judiya en Atena.
Gresya peryo la mas grande partida de su populasyon judiya en la Solusyon Final, komparando al kualsiker otro payis de Evropa durante la Segunda Gerra Mondial. Alrededor de 65,000 ombres, mujeres i kreaturas fueron enbiyadas a la muerte en Auschwitz entre los anyos 1941 i 1944.
Despues ke miles se fuyeron, en Avril del anyo 1944, mil judyos gregos fueron embiyados al kampo de konsantrasyon, ande Dr. Mengele eskojo 320 ombres i 328 mujeres para azer sus investigasyones medikales. Los 352 ke no valiyan para las envestigasyones, fueron kemados en los krematoryos.
La komunidad judiya del payis izyeron una larga i dura kampanya para ke se konstruize un monumento. El sityo ke la munisipalidad de Atena les izo donasyon, se topa serka de la sinagoga, en la kaye Melidoni, ande los judyos de Atena fueron kapturados por los alemanes.
La artista DeAnna Maganias eskrivyo enriva de una plaka en el sityo, lo ke el sovrevivente del Olokosto, Elie Wiesel, aviya eskrito: “la inumanidad ke el ombre izo al ombre”.
Tayada en la forma de la Estreya de David, ke es el simbolo del djudaizmo, las sesh puntas de la eskultura estan amostrando las sivdades i los puevlos de Gresya ke fueron deportados. La eskulptura fue dezinyada kon grande semplisidad i grande maestriya.
El monumento de marmol se topa en una guerta de yervas. En este lugar trankilo, puedemos topar tambien la idea de ‘kurasyon’. Los sesh pedasos del monumento ke tyenen la forma de triangolos, son rotos ma el pedaso santral, un blok heksagonal, ke esta intakto, rekuerda el renasimyento i la sovrevivensya. Los sesh triangolos del memorial estan separados del blog santral. Esto tambien es simboliko. Kere amostrar ke famiyas fueron divizadas, separadas en el Olokosto. A vezes la muerte los separo.
‘Este monumento mos akodra lo ke puede afitar kuando las personas pedren la toleransya a las personas diferentes’ disho el Prezidente del Konsejo Judyo Santral.
Mary Michalidou, eksperta en monumentos en Gresya, esta akseptando ke la konstruksyon del monumento tadro muncho, ma eya disho ke komo estetika i semboles, este memorial es uno de los mijores memoriales del Olokasto en Evropa.
