Kero ampesar en pasando mis kondoleensyas a muestro payis ande bivimos, por la piyedrita de los 36 askerikos mansevikos, en la Sirya. Ke sus almas repozen en pas i tanbien el Dio ke de pasensya a sus famiyas.
Keridos amigos, la perasha de esta semana ke se yama Teruma es bazada sovre el sujeto de “dar”. Dar tsedaka, dar un regalo o dar otra koza. Todas las relijyones tienen temas asemejantes. En los Kristianos, “la karidad”, en los muzulmanos “zekat”.
Ande mozotros los judyos, es akseptado ke “dar” mos da dinyita, (ke es la parte psikolojika del akto) i ke a la kontra “resivir” mos aze solo plazer. La Tora rekomenda a los menesterozos mizmo, de dar una chika parte de lo ke tienen para gozar de esta “dinyita”. Un otro prensipyo es ke, el ke da no kale ke se glorifike, i el ke toma no se arebashe.
Esto dicho, vos kero kontar un evenimyento ke mi marido i yo fuimos shaetes (testigos).
Un diya, un amigo le disho a mi marido ke kere azer una bienfezensya en siendo donator a los gastes de eskola de un elevo/a asta la fin del lise. Kon una kondisyon ke, ni el keriya saver ken es el elevo/a, ni el elevo/a deviya de saver ken es el donator. Le demando si konosiya este modo una famiya. Un nes del Dio, konosiyamos una famiya onoravle ke ensupito se topo en difikultad finansiera i teniya una ijika, muy buena eleva, ke aviya pasado akel anyo al lise i mas no puediyan abasteser a los gastes. Pishin mos metimos en kontakto kon esta famiya ke estuvieron muy kontentes, siguro en bendizyendo al donator. I el sistem ampeso a lavorar. Kada tiempo del ekolaje, el donator mos dava la suma del ekolaje i mozotros la pasavamos a la famiya para ke page. Por una parte estavamos mozotros muy kontentes de partisipar a esta mitzva i por otra parte mos estavamos merikiyando ke ya si algun diya diziya el donator ke mas no puede pagar, por ke kada anyo pujava la suma.
I lo ke pensimos mos vino a la kavesa. Despues de un anyo vino el donator ande mi marido i le disho ke malorozamente sus echos mas no estan tan buenos i mas no va pueder alevantar el pezgo de pagar el ekolaje de la ijika. Atyo Sinyor del Mundo! Ke vamos azer? El Dio es grande, aspera veremos. Mozotros tanbien teniyamos responsabilita en este akto. Akeya noche no supimos kualo pensar i kualo azer. Al diya, vino el donator de muevo ande mi marido i le disho: Saves se lo konti a mi mujer, i mi mujer me disho: No puedemos ezvachearmos de esta mitzva. Vamos a komer pan i sevoya i vamos a kumplirla asta la fin.
Mos se aviya inchido los ojos de la alegriya i de la emosyon. Keridos amigos, mira lo ke afito, ke despues de este akto, komo un mirakolo se le enderecho el echo de akel amigo i aparte de esto se le engrandesyo dopyo.
Este evenimyento es egzempyo bivo de la perasha de esta semana.
