Kenan Cruz Çilli
Ya estamos en muestra segunda semana de karantina. Oy fue la primera vez en ocho diyas ke sali de la kaza. Naturalmente en muestro ochen diya, ya teniyamos menester de algunas kozas bazikas en la kaza. Entonses yo sali para merkar unas kozikas en el supermerkado. Kuando yegi al supermerkado aviya una kola muy larga afuera. Tuve ke esperar kaji medya ora asta ke pude entrar al supermerkado. En la fila aviya una distansiya de tres metros entre kada uno de mozotros i una polisiya ke deshava entrar a uno kuando saliya el otro. Por lo menos el supermerkado estava bastante yeno de produktos, no aviya dinguna etajer vaziya komo vide en munchas fotografias en el internet. Finalmente, kuando yegi a kaza alimpiyi todo lo ke aviya merkado i tambiyen dizenfekti las yaves de la kaza.
Komo esta kada vez peor i peor la situasyon en kaji todo el mundo i sovre todo aki en evropa, todo tipo de kuidado es poko. Yo esto en Portugal kon mi granmama ke ya tyene 80 anyos. Entonses ya sinto dainda mas la nesesidad de tener muncho kuidado porke eya ya esta en una edad de riziko mas alto. Este tyempo es muy importante para akodrar a todas las personas ke se eskarinyan de mozotros i ke amamos. Kale siempre ke mantengamos la distansiya sosyal i estar fizikamente leshos de muestros amigos i famiya, ama tambien tenemos ke sintirmos mas serkos i djuntos ke siempre, telefonando, enbiyando mesajes, i demandando si alguno tyene menester de alguna koza, lo ke kere ke sea.
Ya parese ke la situasyon va a kontinuar peorando para algunas semanas, ama tambien es sierto ke kuando eskapa esta pesadiya solo mos vamos akodrar de las kozas buenas ke bivimos. En todo el mundo estamos viendo egzemplos de echos buenos i echos de karidad ke mos esta demonstrando ke la umanidad kontinua fuerte siempre i malgrado todo. Por egzemplo, en la Turkiya la djente aplaude a todos los medikos i enfermeros kada noche. Munchos belediyes en el payiz estan alimentando los animales de la kaye ke agora estan mas vulneravles. En Italya i Espanya ay munchos videos de djente kantando de los balkones, intentando a alegrar unos a los otros. I son estas kozas ke mos ayudan a kontinuar mas positivos. Ke kedesh todos en la kaza i pasesh una karantina buena!
