Pesah es la fyesta de la libertad, de la independensya. Mos aze akodrar la salidura del esklavaje de Misrayim. Muestros padres se apatronaron de sus identidades en luchando.
Pesah es el nasimyento de la nasyon djudiya. El mez de nisan es el primer mez del kalendaryo djudyo ke da la novela de la primavera. Todas las famiyas se arekojen al doredor de la meza de seder; i se akodran de esta lejenda de sus ansetros i transferan la istorya de djenerasyon en djenerasyon.
Esta fyesta tyene dos nombres diferentes; “PESAH” i “HAG HA MATZOT”.
“Pesah” mos aze akodrar la proteksyon santa i mirakoloza ke en la katastrofa Dyo detuvo a los ijos de Israel leshos de las belas.
“Hag ha Matzot”, mos akodra, ke en esta semana sakra vamos a komer solo matsa ke se aze de arina sin levadura.
Las fyestas son las okazyones de aunar a todos en el entorno de una meza. Madres, padres, iijos, ijas, nonos, nonas, inyetos, inyetas, tiyos, tiyas, kosfuegros.
Todo el umanizmo se apanyo a los pasos lokos de la vida moderna. Todos estamos koryendo, para un buto, i siguramente las oras i los diyas no mos estan abastando. Mos estamos olvidando de vez en kuando ken semos, i no mos estamos puedyendo apartar un punto libero. En bivyendo esta manera tenemos mas muncho stres, mas muncha inkyetud en todo modo de punto de vista. No kale ser tanto asigidos!...
Los mansevos keren tanto alkansar a sus butos, ke se estan olvidando de las famiyas, de sus keridos. Para eyos lo ke es emportante son los amigos.
La famiya es la baza de la komunitad, de la sosyeta. La famiya determina el avenir de la sosyeta kon los faktos; de la kerensya, del respekto, de la toleransya, de la solidarita, de la unyon, de la ermandad, de la amista, del amigable... Estos faktos son emportantes por la umanita, i se forman en la famiya. La famiya tyene un rolo emportante en la formasyon de la personalita. Las reunyones de famiya kontyenen todos los myembros de la famiya para pueder avlar, sintir al den frente, para azer planos, para pueder eksprimir los sentimyentos, las keshas, las preokupasyones, para pueder rezolver los pletos, i para pueder planifikar los daivertimyentos de la famiya. Seder es la regula de la meza ke se apareja en las kazas djudiyas por la noche de fyesta kon muncha atension. En la meza se topa: los livros de la Agada, vazos de vino para todos i un plato espesyal de Seder. Se mete enriva de un tifsin: un guevo haminado, tres matsas enteras, un pedaso de kodrero kocho, haroset, karpas i maror. Esto todo tyene una sinyifikasyon aparte. Mizmo ke es una fyesta muy kanseryoza para la balabaya; porke eya empesa a aparejarse de una semana antes, para pueder eskapar a tyempo; es una felisita muy grande; de arekojer 15-20 personas de la famiya akeya noche. Malorozamente este anyo no pudimos fyestar todos endjuntos a kavza de este virus “Corona” ke ya mos kito la gana de bivir. Estuvimos solos i sekos en muestras kazas. Ay mas de tres semanas ke estamos en kaza sin ver a dingunos solo kon los telefones, whats-up, facetime, instagram, zoom i otras novedades teknolojikas.
Kale azer loores ke estamos todos sanos i rezyos ke es lo mas emportante. Lo ke arogamos es de ser syempre aunados, i pujados i non aminguados.
“HAG PESACH SAMEAH”... El Dyo ke mos ayege para kada anyo sin sar i sin mal.
