Eskrito en Marso 2006, revizado en Marso 2020
Antes tres siglos, un eskrivano fransez, Saint Evremond disho: “La konversasyon syendo el
medyo ke ata la sosyedad, es kon eya ke se rije el dar i tomar de la vida sivil, ke las personas
se komunikan las ideas, ke los korasones se ekspriman, i las amistades empesan i se
konservan”.
Muncha djente apresyan mas ke todo el arte de konversar, ke portanto, demanda syertas
vertudes. En prensipyo, se deve posedar un minimum de kultura jeneral, (siguro lo demaziya
no aze danyo!) un meoyo bivo i urbanisto, esto todo akompanyado de una boz, mas o menos
agradavle, i un dono de komunikasyon kon el denfrente.
Devemos achetar ke la mas parte de las konversasyones son monologos. Uno avla, i los otros
asperan la okazyon de dizir unos dos byervos. Komo disho Montaigne: “La palavra es mitad
de la persona ke avla, mitad del ke lo syente”.
Mezmo sin tener un talento espesyal, puedesh ganar la reputasyon de konversador! Ke
manera? Vos va dar un chiko sekreto: basta saver oryentar vuestro interlokutor verso un
sujeto en el kual, el es ekselente. Naturalmente, i vozotros, devesh de tener una preferensya, o
a lo menos, una konosensya. En kavzo kontraryo, ay probabilita de enfasyarvos un poko! I, de
mezmo, si es un sujeto ke no konosesh bueno, puedesh toparvos en difikultad.
Myentres la konversasyon, de vez en kuando, demandash a vuestro interlokutor, syertos
detalyos, syertas presizyones. De esta manera, va entender ke vos enteresatesh al sujeto.
Alora, estad siguro, ke el o eya vos dira: “Sinyor, o sinyora, tuve grande plazer de vuestra
briyante konversasyon”. Sin ser un fenomeno, se puede fasilmente avlar de diversos sujetos.
Basta ke se tome la pena de enrikeser su kultura jeneral, en meldando, estando al koryente de
la aktualidad ets. Es, tambyen importante de estableser un koryente de simpatiya (ma syempre
no puedeser posivle!)
En una konversasyon, es evidente ke devemos eskojer los byervos djustos i mezmo simples,
ke ekspriman muestra idea. No ay menester de empleyar palavras komplikadas o sofistikadas,
para mostrar ke sosh kultivados! Tambyen se deve bushkar byervos, apartenyendo, mas o
menos, al nivel de los ke mos estan sintyendo. Deven entender lo ke estamos dizyendo. No
kale olvidar ke ay diversos grados de kultura, lo ke es muy normal.
Esto, lo estamos bivyendo aktualmente, en el Djudeo-espanyol. Munchos, estan keshozos de
no entender muy bueno lo ke estamos eskrivyendo en esta lingua. I estas personas avlaron el
Djudeo-espanyol, toda sus vidas. Entre amigas afilu, es preferavle de no tener la uzansa de
byervos “argo”. Tambyen, se deve azer atansyon a byen pronunsiar las palavras. “Munchas
vezes, se syente mal, lo ke kreemos aver byen oyido”. Esta fue una dicha de Moliere. Si se
trata de un sujeto grave, evitad de mesklar shakas i “espris”. Pueden ser mal interpretados. No
savemos syempre, si el de enfrente, es kapavle de apartar.
En una konversasyon, devemos amostrar muestro entereso i sintir la persona ke esta avlando.
Es un sinyo de politeza. Es tambyen, provechozo si se trata de un tema interesante. Komo
disho Jussieu, “El ke syente, munchas vezes, empleya su tyempo mijor ke el ke avla”.
Asegun los espesyalistos, la konversasyon es una rekreasyon mental i adjustan: “kada vez ke
vash azer deskuvyertas vash a kerer ke i los otros profiten. Esto vos va dar la okazyon de una
konversasyon”.
En vezes, tenemos la ovligasyon de avlar kon ajenos. Ay syertos sujetos klasikos, komo
livros, sinema ets. Si las oras pasando puja la intimita, las dammas empesan a avlar de moda,
reseftas de gizados ets., myentres ke los ombres, los echos, el spor. Enfin, son sujetos ke dan bastante materyal.
Sin egzajerar, un buen dialogo puede ser konsiderado komo un “arte”. No seriya yerrado de
dezir: “Tyene buena konversasyon, por alguno ke poseda la yave de este arte”. I, por eskapar,
una refleksyon de La Rochefoucauld: “El sekreto del plazer en las konversasyones, es no entrar muncho en los detalyos de las kozas”.
