El famozo eskrivano franses del siglo 17, La Fontaine, en una de sus fabulas famozas, karikaturizo el diyalogo ke paso entre estas dos bestias, sigun el entendimyento de su tiempo. El dize en su fabula, ke el lavoro de kada diya ke aze la ormiga, echo kon seriozita i atansyon es muy valorozo i ke la sigala deviya de azer lo mizmo al lugar de kantar enverano entero.
En la fabula, la ormiga lavoro enverano entero i arekojo bienes para el invyerno, mientres ke la sigala kanto enverano entero i kuando vino el invyerno i se kedo ambyerta, se fue a demandar ayuda de la ormiga. La ormiga le disho una fraza ke se izo muy famoza kon el tiempo. Le disho: “Enverano entero estuvites kantando, agora bayla veremos!”.
Fina muestra manseves, el mundo entero kontinuo a alavar la ormiga i arebashar la sigala. Ma kon tiempo avagar avagar troko la situasyon i oy se izo el kontraryo. La djente en jeneral se estan burlando de las ormigas i las estan menospresyando. Los mansevos ke vieron a sus padres ke lavoraron duro, ke se kitaron la alma para ganar dos groshes i no pudyeron salir de la klasa medyana, agora se estan adjideyando de eyos al lugar de estimarlos. Kon esto no keren asemejar a sus paryentes. A la kontra keren asemejar a los ke “reusheron” i se enrikesyeron.
Es enteresante de ver komo troko la mentalidad del puevlo en 40-50 anyos. Todos keren “aboltar la kyoshe” komo dizen en turko, una ora mas presto.
Si la majorita del puevlo pensa ansina, i kuando solo ganar paras parese mas valutozo de todo, sigun estos pensadores i eskrivanos devra de aver una modifikasyon fundamentala, ke se aspera despues de la Corona.
Deke vos esto kontando esto, agora ke estamos enserrados en las kazas por modo de esta maldicha Corona? Vos dizere la razon. Ay muncha djente, jurnalistos i pensadores ke dizen ke despues de agora nada no va ser mizmo de antes esta epidemiya. Este virus no solo mos enserro en las kazas, izo serrar tanbien botikas, sinemas, kuaföres i mas. Se troko todo en muestras vidas sin diferensyas del nivel sosyal. Al riko komo al prove mos esta dando una lesyon de vida.
Agora ke empesimos a maraviyarmos de las kozas chikas i vemos ke kedimos leshos de las kozas ke antes eran muy valutozas para mozotros, kere dizir ke estamos en un trokamyento radikal.
Se esta avlando mizmo ke la baza del kapitalizmo va trokar.
Yo ago parte de los ke pensan ke nada no va trokar, todo va ser “eski tas, eski hamam”. Solo siguro el lavar las manos, la ijyen en jeneral mos va kedar i los bezos ansi ke saludar en dando las manos se van a alevantar.
Ma sigun mi es dainda muy presto para avlar de esto todo. En primero miraremos de salir sanos i rezyos de esta grande epidemiya ke suvyo de grado en azyendose pandemiya.
Salud buena para todos.
