Isak Eskinazi
Aze miles de anyos, imigrantes de Turkiya de oy, i de Iran de oy, vinyeron al Norte de Israel, a los Galiles, i esta yegada de estos imigrantes izo trokar la kultura de estas rejiones. Los muevos estudyos mos dizen ke esta djente trusheron muevas kulturas i tan bien izyeron trokar la jenetika de la djente lokal azyendo los ojos mavi, koza ke no se savia en esta jeografiya.
Segun el DNA de los 600 puerpos ke estavan en las tumbas de aze 6500 anyos, los arkeologos rezin deskuvyeron los trokos ke estos puevlos istorikos izyeron. Las analizes del DNA mostraron ke estos puerpos guardados en estas tumbas eran diferentes de los puevlos ke bivyeron en esta rejion. Siertas diferensyas jenetikas korespondiyan a los puevlos ke biven en Anatolya en las montanyas Zagros, ke agora azen parte de Turkiya de oy i una grande parte aze parte de Iran de oy.
Lo ke era Israel, ke antes se yamava Galile, pertenesia a la rejyon konosida komo Levante. Levante oy se konsidera komo el este del Mediteranyo i entre los anyos 4500 /3500 antes muestra era, esta rejion tuvo munchos trokamyentos. El troko el mas fuerte fue en la Kueva de “Peki’in”. Peki’in es un kazal en Israel, entre Akko i Nahariya, en un Monte ke se yama Monte Heron. En este kazal oy moran los Druzim. En su livro, “La guerra Djudia”, el famozo istoriador djudyo Josephus avla de este kazal. Esta kueva mezura 17 mt. sovre 8mt. Ayi toparon djarros i ofertas para muertos kon syenes de puerpos de mas de 6000 anyos. Los estudios del DNA se izyeron del polvo de guesos de siertos puerpos i asi se supo ke este DNA korresponde a la ke oy se enkontra en las rejyones de los Zagros. Demonstraron ke la jenetika enkontrada pertenesiya a personas kon “ojos mavis”.
Es ke en los estudios tanbien mostraron ke todos los ke tienen ojos mavis apartenesen a los mizmos antepasados bivyendo en Jordania, Turkiya i Danemarka. Esta linya viene de mujeres, es dizir de linya maternal, i esto mos mostra ke 49 por siento de la povlasyon de los Galiles, tienen ojos mavis.
Todos estos estudios mos dan a pensar ke el mundo troko siempre kon migrasyones respektivas.
Adaptado de Live Science
