Aviya dos semanas ke Yakup Barouh, amigo de munchos anyos, mas aedado de mi, ma era mansevo kon su modo de vida, de penseryo, su punto de vista… fue ospitalizado no tenyendo una koza muy emportante!
Dos semanas antes, diya de Shabat organizando mi biblioteka topi un livro ande aviya un artikolo ke le puediya enteresar i lo embiyi, me respondyo … I esto duro dos diyas. Alhad despues de midi, kuando le estava eskrivyendo, me vino haber ke esta en el ospital. No puediya ser posivle. Le demandi. I me disho ke toparon una chika mancha en el filmo de sus pumones i lo echaron al lado de su mujer Doli, ke teniya la Korona. I unos kuantos diyas despues Doli salio del ospital ma malorosamente Yakup estava en la seksion intensiva i intubado. Kada diya estava telefonando para demandar komo estava. I malorozamente no tomi ni un diya un buen haber. I noche de myerkoles mos ambezimos el negro haber. La muerte de Yakup Barouh. No puediyamos salir a la kaye. I muestro ko-prezidente Ishak Ibrahimzadeh ke se okupo reelmente muncho kon esta hazinura reusho mizmo a trayer 10 personas para pueder meldar un kadish. Yakup no era un ombre ke se devia de ir de este mundo sin ke dingunos avlen sovre el. Kon una seremonia ande solo unas kuantas personas puediyan alkansar.
Yakup era prezidente de una kompanyia de publisidad. Kreo ke es la kompanyia la mas vyeja de muesto payis. Mas de 110 anyos. Dava lisyones en la universitad en su karyera.
Kualo eran sus relasyones kon la Komunidad Djudia? Rıfat Saban, ke fue presidente de muestra komunidad disho ke lo konosyo kuando teniya 15 anyos i kreo ke lo konosyo en el Orfelinato. Rıfat era presidente i Yakup vino a lavorar para esta ovra. I 45 anyos lavoro en todo modo de ovras. Fue presidente de la Komunidad durante los anyos 1991-92. Mizmo despues de su presidensya kontinuo a ser Konsejero del Gran Rabino. Por los ke no saven, el Konsilyo el mas emportante es el Konsilyo de los konsejeros en muestra komunidad. I se forma de 60 almas. Son eyos ke dan karar para las desiziones emportantes.
Yakup lavoro munchos anyos para la Fakirleri Koruma. Empeso a ser miembro de la administrasyon kuando tenia apenas 30 anyos. I todos lo kerian bien porke era el solo ke savia la teknolojia. Las makinas de projeksyon en esta epoka era una maraviya. I sus konferensias eran muy diferentes porke empleava la teknolojia. El fue presidente de la Asosyasyon entre los anyos 2002 i 2004.
La fondasion de los 500 Anyos fue formada por mas de 100 personas estimadas en el anyo 1989. I Yakup era uno de estas personas. Munchos anyos era uno de los vise-prezidentes de esta fondasyon.
Dos mezes antes kuando lo vide le dishe ke keremos realizar una ekspozisyon en el Muzeo Djudio sovre las publisidades de las Kompanyias Djudias entre los anyos 1920-1950. Me disho, “Ven una demanyana ande mi i vamos a organizar lo ke keres”. Malorozamente no fue kismet.
Ke su alma repoze en Gan Eden. Amen!
