Kenan Cruz Çilli
En los ultimos anyos un fenomeno interesante se realizo en la kultura de Israel. La kultura muzikal i la lingua ansestral de munchos grupos de djudios ke estavan kaji olvidadas se torno a ser popular de una manera mueva ke no fue asperada. Komo savesh, kuando el estado de Israel fue fundado en 1948, munchos djudios del mundo entero empesaron a azer aliya i munchos de eyos tuvieron de deshar sus kultura i lingua nasyonal para krear a una kultura mueva ‘Israeliana’ ke era unido por ebreo.
Durante la istoria, siempre se topavan komunidades djudias grandes en kaji todo el medyo oriente, i klaro ke todas estas komunidades teniyan kostumbres i tradisyones unikos ke kontinuan a ser observados en los lugares ande ay una diaspora mizrahi. Por egzemplo, komo ladino es la lingua de los djudios sefaradis, i yiddish la lingua de los djudios ashkenazis, judeo-arabe era i kontinua a ser la lingua tradisyonal de los djudios mizrahis. Malorozamente esta kultura fue menospresiada en las primeras dekadas de la istoria de Israel. Komo rezultado, la lingua judeo-arabe no fue pasada a las muevas jenerasyones i oy muy pokos entre los mansevos pueden avlarlo o entenderlo.
En los ultimos anyos ay un muevo trend ke agora ya se esta aziendo enternasyonal. Las muevas jenerasyones de djudios mizhrahis empesaron a tornar a sus raizes, adoptando de muevo la kultura de sus granpapas i granmamas. Un egzemplo maraviyoso es la kultura de los djudios de Yemen. Yemen es un payiz uniko kon una istoria muy muy larga i enteresante. Los djudios de aya formavan una de las komunidades djudias mas viejas en el mundo. Ansina tambien, sus kultura muzikal es muy unika i espesyal.
Los mansevos de Yemen teniyan una tradisyon de muzika liturjika. Kantavan kantes relijiosos, mesklando las linguas de arabe i ebreo. Esta kultura no permitia el uzo de enstrumentos muzikales i era solamente por los mansevos (ombres). I kuando los mansevos estavan muy okupados a kantar kantikas relijiosas, las mujeres enventavan sus propria kultura muzikal. Kantando sovre sujetos sekulares komo amor, envidia, vino, o el tiempo. Estas kantikas eran folklorikas i anonimas.
Ultimamente, esta kultura folkorika nasyo de muevo. Tres ermanas de orijen Yemenita, ama de tersera jenerasyon en Israel fundaron un grupo muzikal ke se yama A-WA. Eyas bushkaron kantikas antiguas ke kantavan sus granmama, kantikas djudias foklorikas de Yemen, i adoptaron estas kantikas a la kultura de oy. Eyas kombinan elementos de Yemen kon ritmos modernos de muzika pop, kantando en judeo-arabe, ke es sus lingua ansestral. Muy presto eyas reusheron a reinventar la kultura Yemenita en Israel. I no solo en Israel, las ermanas de A-WA agora son uno de los grupos israelianos mas populares en el mundo entero. Yo fui a sus konsierto en el anyo pasado en Amsterdam, i kuando vide el publiko enorme kantando en judeo-arabe i baylando pensi: ke enteresante ke una kultura ke fue tan menospresiada es agora la mueva kara de la kultura israeliana en el mundo!
