Kada dia digo mas no kero oyir ni avlar de la corona, de la pandemia, del Covid19 ke ya mos izimos todas espesyalistas de hazinuras infeksyosas. Seya en la televizyon, seya en la radyo no ay otro sujeto.
Tomi una desizyon: ken me esta avlando de este sujeto, lo esto kortando kurto i no la esto bushkando mas. Esto preferando konversar kon ken me achileya el korason. Porke ay muncha djente pesimista ke te lo karadean lo de aryento.
Para no pensar i deziluzyonarse kale azer aktividades muevas. Porke despues de mez i medyo ke estamos en kaza enserrados, meldar livros, mirar filmos i serias de TV, todo enfasya.
Las semanas pasadas komemorimos el Yom aShoah i el Yom Azikaron i detras fyestimos el Yom Atsmaot. El kerido İzzet Bana mos dyo una misyon de aparejar 3 kantikas para estos diyas, kon provecho de la teknolojia i el Zoom. La una de las kantikas era “AMEN” ke la kantimos munchas vezes en los konseres, la segunda “ELI ELI” i la de alkavo “POR VER TU BANDYERA”. No fue muy fasil para mozos de enrejistrar 3 kantikas en kaza kon telefon i kon un komputer. Ma para las damas del koro NES no ay difikultad, ya parvinimos.
“ELI ELI” en ivrit kere dizir “mi Dyo mi Dyo”. Una kantika muy sentimental i en mezmo tyempo tyene una istorya muy enteresante de la eskritora de palavras, HANNASZENESH.
HANNA SZENESH nasyo el 17 julio en el anyo 1921 en Budapest, Ungaria, ija de un eskritor i periodista. Hanna teniya un talento literal i kon esto empeso a eskrivir a un diaryo desde 13 anyos fin unos kuantos diyas antes su muerte. Su famiya fue asimilada; en Budapest aviya un antisemitizmo dezgrasyado. Kon este sentimyento, desho su pais ke nasyo i partyo por Erets Israel en el anyo 1939 i se enstalo en el Kibutz Sdot Yam. Ayi eskrivyo poezias i teatros sovre la vida del Kibutz.
En el anyo 1943, Senesh entro a la armada Ingleza i tomo una misyon de ayudar a los djudyos situados de la Evropa. Tomo formasyon en Ejipto i se ambezo a saltar kon parashutes.
En el anyo 1944, salto a Yugoslavia i se izo a la una kon los partizanos de Tito por su idealismo.
El 7 de junio 1944 paso a la frontyera ungara para salvar su puevlo ma la polisiya la aferro. La torturaron ma eya no avlo ni dyo en mano a dingunos.
En oktobre 1944, en el ultimo odjuzgado, kon grande koraje se defendyo ma malorozamente el 7 novembre 1944 a los 23 anyos fue kondanada a muerte.
En 1950 fue yevada a Yerushalayim al simeteryo Monte Herzl.
Su diario i sus ovras literaryas se publikaron despues de su muerte. El mas konosido de sus poemas es “ELI ELI”.
La melodiya fue kreada por Davit Zahavi i kantada por Ofra Haza i mas. “ELI ELI” se kanta kada anyo en el diya de la Shoah.
HANNA SHENESH oy en diya es un eroe nasyonal en Israel.
