Nesi Altaras
Muestros ekranes estan yenos de artikolos i opiniones sovre la pandemiya. Malorozamente munchos de estos, en gazetas, jurnales i sidutas virtuales, son syegos. No estan viendo la realidad de las klasas sosyoekonomikas. Dizen palavras komo “el virus no esta mirando a la rikeza” ma esta idea es una falsedad.
De verdad, la pandemia es mas kolay fizikamente por los patrones i personas ke lavoran en buros. Es posivle por estas klasas serrar las puertas de sus kazas, kedar ariento, enkomendar kozas ke tienen menester online i lavorar en sus komputadoras. Esta djente kontinuan resivir sus paras sin riziko a sus vidas o a las vidas de sus famiyas.
No es el mismo por los ovreros i lavorantes ke no tienen posibilidad de kedar en kaza. Sus lavoros kontinuan. Ni el governo ni los patrones serran sus fabrikas. En otras kavzos, algunos patrones serraron los echos ma dieron kamino a sus ovreros, deshandolos sin medyos de sovrebivir. En kavzos de lavorantes en las butikas, el riziko es muy grande, espesyalmente por los bakales. Ma sin estas paras, no tienen bastante por menesteres esensyales komo la kira, el mas grande gaste de munchos. El governo no esta parando los gastes de kira i por esto los lavorantes tienen menester de kontinuar sus lavoros.
Tambien esta situasyon produse las inigualdades de jenero i de rasa. Konsiderá los lavorantes al dia: el grande parte son mujeres. Durante la pandemia no es posivle por eyas de lavorar. Ma tienen menester de paras i no estan resiviendo un seguro de desempleo porke sus lavoros no estan rejistrados. En este tiempo de pandemia, las mujeres en situasyones danjerozas kon famiyas violentas están en rizikos aumentados. I en sosyedades multirasial komo los Estados Unidos ande egziste una konseksiyon entre raza i rikeza, los muertos de korona ven mas entre las komunidades de pretos, latinos, i nativos de Amerika.
De estas i mas, razones no es posivle dezir ke la pandemia es una krisis igual para todos. La pandemia produse i empeora las diferensias de klasas, jeneros, i rasas. La pandemia revela komo de korrumpido muestra sistema es.
