Kenan Cruz Çilli
Seguro ke en estos diyas de karantina, kada uno de mozotros esta bushkando kozas para ke el tiempo se pase mas presto. Se ke munchos estan meldando livros o jurnales, otros gizando kozas maraviyozas (i despues partajando las fotografiyas en las medias sosyales!). Algunos estan el dia entero viendo filmos o dizis en la televizyon o en Netflix, i otros ambezando kozas muevas en kursos online. Yo empesi la semana pasada a un kurso de tres mezes del Ermenesko. Siempre me keria ambezar esta lingua i agora tengo muncho tiempo para dedikarme a esto. Una otra koza ke esto aziendo es oyir muncha muzika. Kreo ke la muzika realmente tiene la kapasidad de azer todo mas alegre. I kuando pasamos unos momentos oyendo kantikas kon los ojos serrados, la muzika tiene el poder ekstraordinario de transportarmos a lugares diversos i epokas diferentes.
Estos diyas tengo las ganas de deskuvrir muevas muzikas de todo el mundo. Komo no puedo viajar, esto invertiendo mas tiempo a eksplorar el mundo a traves de kantes i ritmos. La semana pasada eskrivi sovre la tradisyon muzikal de los djudios de Yemen ke se esta aziendo kada vez mas popular kon las muevas jenerasyones. Esta semana va kontinuar kon la mizma tema de tornar a los raizes. Algunos anyos atras, en el programa de The Voice (O Ses) en Israel, una manseva sorprendio a todos los miembros del juri i a los spektadores kuando saliyo a la shena kantando en turko. La manseva se yama Sapir Saban, i mizmo ke no save avlar en turko, se ambezo a kantar en la lingua achakes de su granpapa izmirli ke estava siempre eskuchando muzikas de su payiz de nasimiento.
En el konkurso, todo se torno dainda mas emosionante kuando uno de los juri (Shlomi Shabbat), ke tambien tiene raizes turkos, suviyo a la shena i empeso de una manera kompletamente spontenea a kantar un duet kon Sapir Saban. Los dos kantaron endjuntos una kantika de Ibrahim Tatlises (ke es muy amado en Israel), mezklando la lingua turka kon el ebreo. El rezultado es sin dingun duda simplemente maraviyoso. Yo vide el video munchas vezes i kada vez siento la mizma emosyon, kale ke todos lo vean. I klaro ke no es sorpresa saver ke a la fin Sapir gano el konkurso de este anyo.
Me plaziyo muncho ver ke en los anyos despues, Sapir Saban kontinuo kantando en turko al lado del ebreo. Topi a una kuantidad de videos de un konsierto espektakular ke izo kon un mansevo turko ke se yama Mehmet Daş en el anyo pasado. Los dos djuntos izieron un konsierto ermozo kon la orkestra de Yerushalayim ke es un orkestra fantastiko. Ansina pasi una tadre luzya, oyindo un turko i una israeliana kantando kantikas famozas de un kurdo todos endjuntos en la sivdad de Yerushalayim. Dinguno no puede dizir ke la muzika no sirve de puente entre payizes i kulturas.
