Algunos diyas atras fue la primera vez en mas de dos mezes ke sali de la kaza para kaminar despues ke se eskaparon las medidas de karantina mandatoria en Portugal. La primera koza ke me rendi kuenta fue ke antes de mi konfinamiento dainda era invierno, ama agora sin dinguna duda ya estamos en la primavera. Kaminando yo vide milyones de flores ermozas de todas kolores i sovre todo una verdura briyante i yeno de vida al mi rededor. No puedo topar las palavras para deskrivir mi emosyon i mis sentimientos de felisidad en frente de todo esto. Yo kamini asta al kazal ke se topa mas serka de la kaza de mi granmama ke se yama Sintra. Si ya vijitatesh Portugal o Lisboa, seguro ke tambien fuitesh a Sintra, ke es un lugar ke parese ke saliyo direktamente de un kuento de fadas. Sintra es muy famozo i turistiko achakes de sus palasyos, kastiyos, i boskes majikos.
Normalmente las kalejas de Sintra estan siempre yenas de turistos, uno ensima del otro, apretados komo sardelas en kuti! Normalmente es kaji imposivle asentarte afilu un segundo para deskansar sin sintir todo el ruido de arabas, otobuses, i tuk tuks (ke son arabas chikitikas ke transportan los turistos de un lugar al otro). Ama esta vez yo topi un kazal kompletamente diferente. Las kayes estavan kompletamente vaziyas de arabas i en sus lugar personas, mansevos i aedados, estavan kaminado (todos respektando el distansiamiento sosyal!). I en jeneral aviya un aire sereno i de paz.
Esto todo me izo pensar muncho sovre muestra relasyon kon la natura, kon las sivdades, i kon la planeta. Muncha djente esta diziendo ke tenemos menester de “tornar a normal”, tornar al mundo de ayer, el mundo ke todos konosiyamos antes de esta pandemia. Ama esto no es ni djusto ni sufizyente. El mundo de ayer no estava en un kamino korekto ni positivo. Aze anyos i anyos ke los sientistas estan avisandomos de la trajedia ke va traer i kavzar los kambios klimatikos. I agora reelmente estamos viendo las konsekuensias de meter los interesos de la ekonomia en frente de los interesos de la salud publika i de la umanidad. Entonses al lugar de tornar atras tenemos ke kontinuar adelante, i topar muevas ideas i inovasyones ke mos ayudaran a meter el mundo en un kamino djusto. Tenemos ke avlar sovre kualo va ser muestra mueva relasyon kon muestra planeta despues del coronavirus.
Si me demandash a mi, un empesijo grande sera restrukturar las sivdades a serka de personas en vez de arabas. Enkorajar muestros governos a invertir fondos i paras en transportes publikos i sostenibles. Developar muevas stratejiyas para un turizmo sostenible para lugares komo Sintra ande el turizmo es una fuente importante para la parnasa de muncha djente. I klaro, empesar a meter la sanedad i bienestar del puevlo en frente de los interesos de los rikos i poderosos!
